«ول پوليتسيادا جۇمىس ىستەيدى» - قازا تاپقان پوليتسەيدىڭ ايەلى جول اپاتىنا كىنالى جۇرگىزۋشىسى تۋرالى

الماتى. قازاقپارات - بلوكبەكەتتە قازا تاپقان پوليتسەي داستان ءابدىقانوۆتىڭ ايەلى دينارا ءابدىقانوۆا جول اپاتىنا كىنالى جۇرگىزۋشىنىڭ قۇقىق قورعاۋ ورگاندارىندا جۇمىس ىستەيتىنىن ايتادى.

ايتا كەتەيىك، جەرلەۋ ءراسىمى بۇگىن الماتىدا ءوتىپ جاتىر.

بۇل تۋرالى Tengrinews.kz حابارلايدى.

ءابدىقانوۆانىڭ ايتۋىنشا، جول اپاتىنا كىنالى BMW جۇرگىزۋشىسى ءالى كۇنگە دەيىن پوليتسيا دەپارتامەنتىندە جۇمىس ىستەپ ءجۇر.

«بۇل وتىرىك. ول پوليتسيادا جۇمىس ىستەيدى. ونى جۇمىستان شىعارماعان»، - دەپ جازعان دينارا Instagram جەلىسىندەگى پاراقشاسىندا.

كەيىنىرەك ول ZTB پورتالىنا بەرگەن سۇحباتىندا جۇرگىزۋشىنى تانيتىنىن ايتقان.

«جۇرگىزۋشى پوليتسيا جۇمىس ىستەمەيدى دەگەن وتىرىك. ول مەنىڭ كۇيەۋىممەن بىرگە تۇنگى اۋىسىمعا شىعىپ ءجۇردى. مەن ولارعا تۇنگە تاماق دايىنداپ بەرەتىنمىن. كۇيەۋىمنىڭ ارىپتەستەرىن تانيمىن. تەك شىندىقتى ايتىڭىزدارشى، وتىنەمىن! قىلمىسكەرلەردى جاسىرماڭىزدار!»، - دەدى دينارا ءابدىقانوۆا.

سونداي-اق، ول مارقۇم كۇيەۋىنىڭ نامىسىنا تيمەي، تەرگەۋ جۇمىستارىن ءادىل جۇرگىزۋدى سۇرادى.

ەسكە سالايىق، كەشە، 25-مامىردا تاڭعى ساعات 05.26 دا BMW ماركالى كولىكتىڭ 1992 -جىلعى جۇرگىزۋشى الماتى وبلىسى قاراساي اۋدانى كوكساي ىقشاماۋدانى قوجابەكوۆ كوشەسىمەن سولتۇستىك باعىتتا كەلە جاتىپ، جاڭا عاسىر كوشەسىنىڭ قيىلىسىندا №4-بلوكبەكەتكە بارىپ سوعىلىپ، ينەرتسيامەن پاترۋلدىك كولىككە سوعىلعان ەدى.

ال كەيىنىرەك كى پوليتسەيدىڭ ولىمىنە كىنالى BMW جۇرگىزۋشىسىنىڭ 6 جىل پوليتسيادا قىزمەت ەتكەنى انىقتالدى.