تانىسىنىڭ كولىگىن ورتەپ جىبەرگەن وسكەمەندىك ۆيدەوعا ءتۇسىپ قالدى

نۇر -سۇلتان. قازاقپارات - وسكەمەندە ەر ادام تانىسىنىڭ كولىگىن ورتەپ جىبەرگەن.

بۇل وقيعا 12-اقپاندا نازاربايەۆ كوشەسىندە بولعان.

ورتەنىپ كەتكەن Toyota Corolla كولىگىنىڭ 28 جاستاعى قىزعا تيەسىلى ەكەنى انىقتالدى. سونداي-اق، وسى كولىكتىڭ ماڭىندا تۇرعان Subaru-نىڭ الدىڭعى جاعىنىڭ بۇلىنگەنى بەلگىلى بولدى.

وقيعا ورنىنا بارعان پوليتسەيلەر قولعاپ پەن بەنزين قۇيىلعان بەس ليترلىك بوتەلكەنى تاپقان.

وسكەمەن قالاسى پوليتسيا باسقارماسىنىڭ مالىمەتىنشە، ەر ادام «سەرگەك» كامەراسىنا ءتۇسىپ قالعان. ونىڭ 33 جاستا ەكەنى انىقتالدى، وسىعان دەيىن سوتتى بولعان.

ەر ادام قازىر تەرگەۋ يزولياتورىندا، ق ر قىلمىستىق كودەكسىنىڭ 202-بابى بويىنشا سوتقا دەيىنگى تەرگەۋ ءجۇرىپ جاتىر.

پوليتسياداعىلار كۇدىكتى مەن زارداپ شەككەن قىزدىڭ تانىس ەكەندەرىن ايتىپ ءوتتى.