تالاپ ساقتالماسا قاتاڭ كارانتينگە قايتا ورالامىز - باس سانيتارلىق دارىگەر
«توتەنشە جاعداي رەجيمىنىڭ الىنىپ تاستالۋى كارانتين شارالارىنىڭ دا الىنعاندىعىن بىلدىرمەيدى. ۆيرۋس ەشقايدا كەتپەگەندىگىن جانە ارامىزدا تارالىپ جۇرگەندىگىن ءتۇسىنۋىمىز قاجەت. بارلىعىمىزدىڭ ماقساتىمىز - ونىڭ ودان ارى تارالۋىنا ءارى سىرقاتتانۋشىلاردىڭ ارتۋىنا جول بەرمەۋ. بۇعان قوسا، ءارقايسىمىزدىڭ، جاقىندارىمىزدىڭ دەنساۋلىعىنا جانە ەلىمىزدىڭ ەكونوميكاسىنا نۇقسان كەلتىرمەي - كارانتين شارالارىن بىرتىندەپ جەڭىلدەتۋ»، - دەدى باس سانيتارلىق دارىگەر ورتالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، بارلىق نىساندار قىزمەتىنىڭ قايتا قالپىنا كەلتىرىلۋى مەن سانيتارلىق تالاپتاردىڭ ساقتالۋى قاتار ءجۇرۋى ءتيىس. «تالاپتاردىڭ ساقتالماۋى ءبىزدى قاتاڭ كارانتين رەجيمىنە قايتا الىپ كەلۋى مۇمكىن. بۇعان قوسا، كارانتيننىڭ جەڭىلدەتىلۋى مەن كوپتەگەن نىساندار جۇمىسىنىڭ قايتا جاندانۋى جاعدايىندا بيزنەس سۋبەكتىلەرىنە ۇلكەن جاۋاپكەرشىلىك جۇكتەلەدى. ولار ءوز قىزمەتكەرلەرى مەن كليەنتتەرىنىڭ قاۋىپسىزدىگىن قامتاماسىز ەتۋى ءتيىس»، - دەدى ايجان ەسماعامبەتوۆا.
اۆتور: مارلان جيەمباي
