تۇرىكمەنستان پرەزيدەنتى نەمەرەسىمەن سەرۋەندەپ، سايگۇلىككە ءمىندى
نۇر-سۇلتان. قازاقپارات - وتكەن جەكسەنبىدە تۇرىكمەنستان پرەزيدەنتى گۋربانگۋلى بەردىمۋحامەدوۆ نەمەرەسى كەرىممەن بىرگە ۆەلوسيپەدپەن سەرۋەندەپ، سايگۇلىككە ءمىندى، - دەپ حابارلايدى «تۇرىكمەنستان بۇگىن» اقپارات اگەنتتىگى.
«مەملەكەت باسشىسى «Yanardag« مونۋمەنتىنىڭ ماڭىنان ءجۇرىپ ءوتتى. ول اتى اڭىزعا اينالعان سايگۇلىكتىڭ قۇرمەتىنە تۇرعىزىلعان. پرەزيدەنت بۇل تۋرالى جانە اسىل تۇقىمدى اقەلتەكە جىلقىسى تۋرالى نەمەرەسىنە ايتىپ بەردى. ۆەلوسيپەدپەن سەرۋەندەۋ بارىسىندا مەملەكەت باسشىسى نەمەرەسىنەن وقۋداعى جەتىستىكتەرى، سپورتتىق جانە شىعارماشىلىق قىزىعۋشىلىعى تۋرالى سۇرادى. كەرىم اتاسىنا نە ۇيرەنگەنىن، قانداي پاندەردەردى وقىپ جاتقانىن، قانداي تاقىرىپتارعا قىزىعاتىنىن ايتىپ بەردى»، - دەلىنگەن ماقالادا.
سونداي-اق، پرەزيدەنت نەمەرەسىمەن بىرگە اقەلتەكە ات كەشەنىنە باردى. گۋربانگۋلى بەردىمۋحامەدوۆ تويلى، ال كەرىم شاپولات سايگۇلىگىنە ءمىندى.
«اتپەن سەرۋەندەۋ كەزىندە مەملەكەت باسشىسى نەمەرەسىنە تۇرىكمەن جىلقىسىن باپتاۋدىڭ قىر- سىرىن ايتتى. سونداي- اق، تاريحتان قىزىقتى مىسالدار كەلتىردى. پرەزيدەنت نەمەرەسىنە «جۇماق« سايگۇلىكتەرى تۋرالى اڭىز اڭگىمەلەر جانە سايگۇلىكپەن شابۋدىڭ ەرەكشەلىگى تۋرالى ايتىپ بەردى. مەملەكەت باسشىسى نەمەرەسىنىڭ اتتى قالاي باسقاراتىنىن باقىلاپ، ونىڭ جىگەرى مەن قۇلشىنىسىنا جوعارى باعا بەردى»، - دەلىنگەن حابارلامادا.
