الماتىعا كىرەبەرىستە بىرنەشە شاقىرىمعا سوزىلعان كەپتەلىس پايدا بولدى

الماتى. قازاقپارات - الماتىداعى بلوكپوستتاردا بىرنەشە شاقىرىمعا سوزىلعان كەپتەلىستەر پايدا بولدى، دەپ حابارلايدى قازاقپارات ءتىلشىسى.

الەۋمەتتىك جەلىدە بىرنەشە كۇننەن بەرى كەپتەلىستىڭ فوتوسى مەن ۆيدەوسى تاراپ جاتىر. قالالىق پوليتسيا دەپارتامەنتى قالاعا سەبەپسىز كىرىپ-شىعۋدى قويا تۇرۋعا كەڭەس بەردى.

«بۇل كەپتەلىس كارانتين رەجيمى باسەڭسىگەن سوڭ پايدا بولدى. كەي ازاماتتار كارانتين اياقتالدى دەپ ساناپ، قالاعا كىرۋگە نەمەسە شىعۋعا تالپىنىپ جاتىر. كارانتين تەك جەڭىلدەدى. بلوكپوستان تەك جەدەل شتاب بازاسىندا اتى-ءجونى تىركەلگەن ازاماتتار عانا وتە الادى. ءار كولىكتى تەكسەرۋگە ءبىرشاما ۋاقىت كەتەتىنى بەلگىلى. بۇل شارانىڭ بارلىعى حالىقتىڭ قاۋىپسىزدىگى ءۇشىن جاسالىپ وتىر»، - دەيدى پوليتسيا دەپارتامەنتى باسشىسىنىڭ ورىنباسارى نۇرلان الماسبەكوۆ.

پوليتسيا دەپارتامەنتى كەپتەلىستەن قاشامىن دەپ قاراما-قارسى بەتكە شىققان جۇرگىزۋشىلەر دە اكىمشىلىك جازاعا تارتىلاتىنىن ەسكەرتتى.