ۇكىمەت ەلىمىزدىڭ ەكونوميكاسىن قالپىنا كەلتىرۋ جونىندەگى كەشەندى جوسپارىن قاراۋدا

نۇر-سۇلتان. قازاقپارات - بۇگىن ۇكىمەت وتىرىسىندا ەلىمىزدىڭ ەكونوميكاسىن قالپىنا كەلتىرۋ جونىندەگى كەشەندى جوسپار قارالۋدا.

جوسپاردى ق ر ۇلتتىق ەكونوميكا ءمينيسترى رۋسلان دالەنوۆ تانىستىردى، دەپ حابارلايدى قازاقپارات ءتىلشىسى.

«سىزدەردىڭ قاراۋلارىڭىزعا 2020-جىلعا ارنالعان ەكونوميكالىق ءوسۋدى قالپىنا كەلتىرۋ جونىندەگى كەشەندى جوسپاردىڭ جوباسى ەنگىزىلۋدە. ۇكىمەت كەشەندى جوسپاردى ۇلتتىق بانك، «اتامەكەن» ۇلتتىق كاسىپكەرلەر پالاتاسى جانە بيزنەس قاۋىمداستىقتارىمەن بىرلەسىپ ازىرلەدى. كەشەندى جوسپار ەكونوميكا سالالارىن قولداۋ جونىندەگى جەدەل شارالاردى قامتيدى. بۇل - سالىقتىق ىنتالاندىرۋ، كرەديت بەرۋدى ارتتىرۋ، ينفراقۇرىلىمدى دامىتۋ، ىشكى ءوندىرىس پەن كاسىپكەرلىكتى قولداۋ، جۇمىسپەن قامتۋدى ساقتاۋ شارالارى»، - دەدى ول.

ونىڭ ايتۋىنشا، حالىقارالىق ۇيىمداردىڭ جاڭارتىلعان بولجامدارىنا سايكەس 2020-جىلى الەمدىك ەكونوميكا 4، ال جاھاندىق ساۋدا 32 پايىزعا قىسقارادى. جىل باسىنان بەرى مۇناي 50 پايىزعا ارزاندادى، مەتالل باعاسى ورتا ەسەپپەن 16 پايىزعا تومەندەدى. بۇل رەتتە، الەمدىك ەكونوميكانىڭ، ساۋدانىڭ جانە ينۆەستيتسيالاردىڭ ودان ءارى قۇلدىراۋ قاۋىپى بار. جاھاندىق جەتكىزۋ تىزبەكتەرى بۇزىلدى، سۇرانىس تومەندەۋدە.

«بۇگىنگى تاڭدا مەملەكەت باسشىسىنىڭ تاپسىرماسى بويىنشا ۇكىمەت تاراپىنان ەكونوميكانى قولداۋ ماقساتىندا، ناقتى ءىس-شارالار ىسكە اسىرىلىپ جاتىر. ميكرو، شاعىن جانە ورتا بيزنەس، سالىق پەن الەۋمەتتىك تولەمدەردەن بوساتىلىپ، تولەمدەردىڭ مەرزىمى ۇزارتىلدى. ولار - قوعامدىق تاماقتانۋ، اگروونەركاسىپ كەشەنى، ساۋدا، ساۋدا ورتالىقتارى، قوناق ۇيلەر، تۋريزم، IT- كومپانيالار جانە باسقا دا قىزمەتتەر. شاعىن جانە ورتا بيزنەستىڭ جەڭىلدىكپەن نەسيەلەندىرۋ قۇرالدارى ەداۋىر نىعايتىلدى. كرەديتتەۋ كولەمى 1 تريلليون تەڭگەگە ارتتىرىلدى. بۇل - «قاراپايىم زاتتار ەكونوميكاسى» باعدارلاماسى بويىنشا قوسىمشا 400 ميلليارد تەڭگە جانە ۇلتتىق بانك تاراپىنان جاڭادان 600 ميلليارد تەڭگە»، - دەدى رۋسلان دالەنوۆ.

ءمينيستردىڭ ايتۋىنشا، «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلاماسىندا ەكونوميكا سالالارىنىڭ قامتىلۋى ەداۋىر ارتتى. سوڭعى سىياقى مولشەرلەمەسى 6 پايىزدى قۇرايدى. جاڭا «جۇمىسپەن قامتۋدىڭ جول كارتاسى» باعدارلاماسى جۇزەگە اسىرىلۋدا.

بۇل ينفراقۇرىلىمدى جاڭعىرتۋعا جانە قايتا قۇرۋعا جاعداي جاسايدى. سونداي-اق جۇمىسپەن قامتۋعا مۇمكىندىك بەرەدى.

«شاعىن جانە ورتا بيزنەستىڭ بورىشتىق سالماعىنىڭ وسۋىنە جول بەرمەۋ ءۇشىن ولاردىڭ كرەديتتەرى بويىنشا نەگىزگى بورىش پەن سىياقى تولەمدەرىنىڭ مەرزىمدەرى 90 كۇنگە ۇزارتىلدى. ۇلتتىق تاۋار وندىرۋشىلەر ءۇشىن مەملەكەتتىك ساتىپ الۋ راسىمدەرى جەڭىلدەتىلدى»، - دەدى مينيستر.