د د ۇ اسسامبلەياسى: قازاقستان كوروناۆيرۋسپەن كۇرەس تاجىريبەسىن ءبولىستى

نۇر-سۇلتان. قازاقپارات - دۇنيەجۇزىلىك دەنساۋلىق ساقتاۋ ۇيىمى اسسامبلەياسىنىڭ 73-سەسسياسىنا قازاقستان دەلەگاتسياسى ونلاين فورماتتا قاتىستى، دەپ حابارلايدى قازاقپارات ءتىلشىسى.

«دۇنيەجۇزىلىك دەنساۋلىق ساقتاۋ ۇيىمىنا COVID-19 دايىندىق، حالىقتى اقپاراتتاندىرۋ مەن وزگە دە ماڭىزدى تاقىرىپتار جونىندە بەرگەن تەحنيكالىق ۇسىنىمدارى ءۇشىن العىس ايتامىز. ءبىز جۇيەنى نىعايتۋ ءۇشىن شارالار جاسادىق. COVID-19 ۆيرۋسىمەن كۇرەسكە باستاپقى مەديتسينالىق- سانيتارلىق كومەك كورسەتۋدى قوستىق. جۇقتىرۋ جاعدايلارىن توقتاتۋ ءۇشىن بارلىعىن جاساپ جاتىرمىز، ءالسىز توپتارعا كوڭىل بولۋدەمىز. تاعى ءبىر ماڭىزدى ماسەلە - سيفرلىق تەحنولوگيالاردى كەڭىنەن قولدانۋ. بۇل كوروناۆيرۋسپەن ءتيىمدى كۇرەسۋ ءۇشىن جاڭا مۇمكىندىكتەردى بەرەدى»، - دەدى ق ر د س م تاۋارلار مەن قىزمەتتەردىڭ قاۋىپسىزدىگى مەن ساپاسىن باقىلاۋ كوميتەتىنىڭ ءتوراعاسى تيمۋر سۇلتانعازيەۆ دۇنيەجۇزىلىك دەنساۋلىق ساقتاۋ اسسامبلەياسىنىڭ 73-سەسسياسىندا.

سپيكەر قازاقستاننىڭ باستاپقى مەديتسينالىق-سانيتارلىق كومەك رولىنە قاتىستى بارلىق ەرەجەگە ايرىقشا ءمان بەرەتىنىن اتاپ ءوتتى.

«مۇندا باستاپقى مەديتسينالىق-سانيتارلىق كومەكتىڭ ماڭىزدى ەكەنىن باسا ايتقىم كەلەدى. ول كوروناۆيرۋسپەن كۇرەستە ايرىقشا ءرول اتقارادى. باستاپقى مەديتسينالىق-سانيتارلىق كومەك سالاسىندا بەكىتىلگەن باستى ۇستانىمداردى ساقتاۋ قاجەت. بارلىعىمىز COVID-19 قارسى كۇرەستە بىرىگىپ، ۆاكتسينا مەن ءتيىمدى ەمدەۋ تاسىلدەرىن جاساۋىمىز كەرەك. بارلىق مەديتسينالىق قىزمەتكەرگە جانكەشتى ەڭبەگى ءۇشىن العىس ايتقىمىز كەلەدى، بۇل داعدارىستى بىرلەسىپ قانا جەڭە الامىز»، - دەدى ت. سۇلتانعازيەۆ.