قازاقستاندىقتار وتاندىق قانداي كولىكتەردى ۇناتادى؟
«قازاۆتو ونەركاسىپ» قازاقستاننىڭ اۆتوموبيل سالاسى كاسىپورىندارىنىڭ وداعى بيىلعى 4 ايدا اۆتووندىرىس سالاسىنىڭ جۇمىس ناتيجەسىن جاريا ەتتى. اتالعان وداق مالىمەتىنشە، قاڭتار-ءساۋىر ارالىعىندا قازاقستان اۋماعىندا جالپى قۇنى 173,4 ميلليارد تەڭگە بولاتىن 23703 اۆتوكولىك قۇرالى (جەڭىل جانە جۇك كولىگىن، اۆتوبۋس تەحنيكاسىن، ارنايى ماشينالار مەن تىركەمەلەردى قوسا العاندا) قۇراستىرىلدى.
ناقتى ماندەگى شىعارىلعان ءونىم كولەمى وتكەن جىلعى كورسەتكىشتەن 84,6 پايىزعا اسىپ ءتۇستى. جەڭىل اۆتوموبيل ءوندىرىسى 1,7 ەسە ارتىپ، 20906 كولىككە جەتتى. اۆتوبۋس تەحنيكاسىن شىعارۋ ءتورت ايدا 73,4 پايىزعا ءوستى. اتالعان كەزەڭدە 352 اۆتوبۋس شىعارىلدى. 2080 جۇك كولىگى قۇراستىرىلدى. ءوسىم 6,8 ەسەگە جەتىپ وتىر. سونداي-اق 289 تىركەمە، 76 ارنايى ماشينا جاسالدى. 2020-جىلدىڭ ءساۋىر ايىندا قازاقستاندىق كاسىپورىنداردىڭ كونۆەيەرىنەن 4867 اۆتوكولىك شىقتى.
بۇل، 2019-جىلعى كورسەتكىشتەن 20,4 پايىزعا جوعارى. دەگەنمەن، وسى جىلدىڭ ناۋرىزىمەن سالىستىرعاندا كورسەتكىش 21,8 پايىزعا تومەندەگەنى بايقالادى. ناۋرىزدا ەلىمىزدە 6229 اۆتوكولىك شىعارىلعان ەدى. رەسپۋبليكا تۇرعىندارىنىڭ وتاندىق اۆتوموبيلدەردى ساتىپ الۋعا جۇمساعان شىعىستارى وتكەن جىلدىڭ كورسەتكىشىمەن سالىستىرعاندا 30 پايىزعا ارتىپ، 91,3 ميلليارد تەڭگەگە جەتتى.
«ازيا اۆتو» ا ق ءتورت ايدا - 5882، «سارىارقا اۆتو ونەركاسىپ» ج ش س 5286 اۆتوموبيلىن ساتتى.
مۇنان ارعى وتاندىق اۆتووندىرۋشىلەردىڭ ءوز ونىمدەرىن ساتۋداعى رەيتينگى مىناداي:
«سەماز» ج ش س (729)، «كاماز-ينجينيرينگ» ا ق (286)، «Hyundai Trans Auto» ج ش س (99) جانە «Daewoo Bus Kazakhstan» (7).
قازاقستاندا قۇراستىرىلعان ەڭ ءوتىمدى جەڭىل كولىك برەندىنە Lada (3685)، Hyundai (3171)، KIA (1952)، Ravon (1369) جانە JAC (193) اۆتوموبيلى كىرەدى.
مۇنان بولەك، وتاندىق كاسىپورىندار ۇسىناتىن برەندتەر قاتارىندا Chevrolet (175)، Skoda (136) جانە UAZ (69) كولىكتەرى بار.
جەڭىل كولىكتەردىڭ Lada Granta (1701)، Ravon Nexia R3 (1369)، KIA Rio (1225)، Hyundai Tucson (1113) جانە Lada Vesta (962) ماركالارى كوپ ساتىلعان.
قازاقستاندىقتار اراسىندا تانىمال مودەلدەر لەگىنە Hyundai Creta (698)، Hyundai Accent (572)، Lada Largus (528)، KIA Sportage (427) جانە Hyundai Elantra (424) برەندتەرى دە كىرىپ وتىر.
