جانداربەك بەكشين ادام تولى اۆتوبۋسقا مىنبەۋگە كەڭەس بەردى

الماتى. قازاقپارات - الماتىنىڭ باس سانيتارلىق دارىگەرى جانداربەك بەكشين قالا تۇرعىندارىنا ادام تولى اۆتوبۋستارعا وتىرماۋعا كەڭەس بەردى، دەپ حابارلايدى قازاقپارات ءتىلشىسى.

قوعامدىق كولىكتەر حالىقتى ورىندىقتارعا وتىرعىزىپ قانا تاسىمالداۋى كەرەكتىگى تۋرالى قاۋلى ساقتالماي جاتقانىن ونلاين بريفينگ بارىسىندا جۋرناليستەر ايتتى. «ءيا، بۇل قاۋلىنى ساقتاۋ قيىن بولىپ تۇر. كوندۋكتورلار جوق بولعاندىقتان، بۇل پروتسەستى رەتتەۋ وڭاي ەمەس. اۆتوبۋستار جولاۋشىلاردى تولتىرىپ الىپ جۇرمەۋى كەرەك. جولاۋشىلاردان ادام تولى اۆتوبۋسقا مىنبەۋدى سۇرايمىز. قوعامدىق كولىكتە وتىراتىن ورىن سانىنان ارتىق ادام بولماۋى كەرەك»، - دەدى ول.

باس سانيتارلىق دارىگەر كارانتين شارالارىنىڭ ساقتالۋىن پوليتسيا باقىلايتىنىن ەسكەرتتى. «جولاۋشىلار وزدەرى قاشىقتىق ساقتاۋى كەرەك. اۆتوبۋس جۇرگىزۋشىلەرىنە تالاپتى ورىنداۋ وتە قيىن. سوندىقتان، ءبىز جولاۋشىلاردىڭ تۇسىنىستىگىنە سەنەمىز»، - دەدى ول.

اۆتور: گۇلميرا عوسمانالي