وتانداستارىمىز شەتەلدىڭ ەمحانالارىنا جۇگىنبەۋى ءۇشىن نە ىستەۋ كەرەك - مينيستر جاۋابى
«ءبىز اۋرۋدىڭ الدىن الۋ مەن ەرتە انىقتاۋعا بەت الدىق. بۇل ءۇشىن ەمحانالىق كومەكتى دامىتامىز. بۇكىل الەم الدىمەن الماتى، ال ودان كەيىن استانا دەكلاراتسيالارىن قولدادى. ءبىراق، ستاتسيونارلىق كومەك تە دامۋى ءتيىس. ويتكەنى، سوقىرىشەك نەمەسە بوسانۋ ەشقايدا جوعالىپ كەتپەيدى. كارديوحيرۋرگتەر مەن نەيروحيرۋرگتەر ينفاركت پەن ينسۋلت كەزىندە، ال تراۆماتولوگ جاراقاتتانۋ كەزىندە قۇتقارۋى ءتيىس. تۋا بىتكەن جانە جۇرە بىتكەن كەمىستىگى بار بالالارعا وپەراتسيا، ال ەرەسەكتەرگە بۋىندار نە بولماسا وزگە دە اعزالار مەن ءتىن ترانسپلانتاتسياسى قاجەت. مۇنىڭ بارلىعىن جانە باسقا دا كوپ دۇنيەنى ستاتسيونارلىق جاعدايدا عانا جاساۋعا بولادى»، - دەپ جازدى مينيستر Facebook پاراقشاسىندا.
الايدا، ونىڭ دەرەگىنشە، اۋرۋحانالارىمىزدىڭ 80 پايىزدان استامى سوناۋ كەڭەس زامانىندا سالىنعان. بۇعان قوسا، 20 پايىزدان استامى ەمدەۋ عيماراتىنا بەيىمدەلگەن، ياعني بۇرىنعى جاتاقحانا، بالاباقشادا ورنالاسقان. اۋرۋحانالاردىڭ جالپى توزۋى 60 پايىزدان اسىپ كەتكەن.
«مۇنداي جاعدايدا الدىڭعى قاتارلى تەحنولوگيالاردى دامىتۋ مۇمكىن ەمەس. ولار پاتسيەنتتەر مەن پەرسونالدار ءۇشىن جايسىز جانە مەديتسينا قىزمەتكەرلەرىنىڭ كاسىبي تۇرعىدا ءوسۋىن تەجەيدى. بۇكىل پروگرەسسيۆتى الەم جاڭا كلينيكالار سالۋدا جانە ازاماتتارىمىز وڭتۇستىك كورەيانىڭ، گەرمانيانىڭ نەمەسە تۇركيانىڭ زاماناۋي اۋرحانالارىندا ەمدەلگىسى كەلەدى. سوندىقتان ءبىز شەتەلدىك سەرىكتەستەردى تارتا وتىرىپ، جاڭا اۋرۋحانالار سالۋىمىز، الدىڭعى قاتارلى مەديتسينالىق تەحنولوگيالاردى ەنگىزۋىمىز جانە ماماندارىمىزدى وقىتۋىمىز قاجەت. جەكەلەگەن ءارى تار ءپروفيلدى ەسكى اۋرۋحانالاردى اۋىستىرۋىمىز كەرەك. تەك سول جاعدايدا عانا زاماناۋي تەحنولوگياعا قول جەتكىزە وتىرىپ، مەديتسينا قىزمەتكەرلەرىمىزدىڭ كاسىبيلىگى جاڭا دەڭگەيگە كوتەرىلەدى. سول كەزدە امبۋلاتوريالىق جانە ستاتسيونارلىق كومەكتىڭ ساباقتاستىعى بولادى. ال قازاقستاندىقتارعا وڭتايلى ءارى ساپالى وتاندىق مەديتسينا قىزمەتى بەرىلەدى»، - دەدى ەلجان ءبىرتانوۆ.
