ايدا بالايەۆا قازاقستاننىڭ پراۆوسلاۆ شىركەۋىنىڭ باسشىسىمەن كەزدەستى
كەزدەسۋ ۆوزنەسەنسك كافەدرالدىق شىركەۋىندە ءوتتى. مينيستر وندا قازاقستاننىڭ پراۆوسلاۆ شىركەۋىنىڭ قايتارىلۋىنىڭ 25 جىلدىعىنا وراي جۇرگىزىلگەن كەڭ اۋقىمدى عىلىمي-رەستاۆراتسيالىق جۇمىستارمەن تانىستى.
ايدا بالايەۆا ميتروپوليت الەكساندردىڭ ەلدە بەيبىتشىلىك پەن بىرلىكتىڭ، كونفەسسياارالىق جانە ۇلىسارالىق كەلىسىمنىڭ دامۋىنا، سونداي-اق وتباسىلىق قۇندىلىقتاردىڭ نىعايۋىنا بەلسەندى ۇلەس قوسقانىن اتاپ ءوتتى.
سونداي-اق مينيستر ميتروپوليتكە كوروناۆيرۋستىق ينفەكتسيانىڭ تارالۋىنا قارسى قولعا العان قاۋىپسىزدىك شارالارى ءۇشىن دە العىس ءبىلدىرىپ: «مەن ءسىزدىڭ ەلدە العاشقىلاردىڭ ءبىرى بولىپ قاۋىپسىزدىك شارالاردى قابىلداعانىڭىزدى، ءدىن شارالارىن ۇجىمداسىپ اتقارۋدى توقتاتىپ، ءدىن وكىلدەرىنە قاۋىپسىزدىك شارالارىنىڭ كوروناۆيرۋستىڭ تاراۋىنىڭ الدىن الۋ ماقساتىندا ءماجبۇرلى تۇردە قولعا الىنعاندىعىن تۇسىندىرگەنىڭىزدى بىلەمىن»، - دەدى.
ءوز كەزەگىندە ميتروپوليت الەكساندار ءمينيستردى قازاقستانداعى پراۆوسلاۆ شىركەۋىنىڭ قىزمەتىمەن تانىستىرىپ، شىركەۋ تاراپىنان اتقارىلاتىن الەۋمەتتىك- قايرىمدىلىق، رۋحاني-اعارتۋ جانە جاستارعا ارنالعان جوبالار تۋرالى ايتىپ ءوتتى.
كەزدەسۋ سوڭىندا ايدا بالايەۆا ميتروپوليت الەكساندارعا مەملەكەتپەن ءوزارا بايلانىستاعى قىزمەتى جانە ارىپتەستىك قاتىناستار ءۇشىن العىس ايتتى.
