ىلە وزەنىندە موڭكە مەن اق امۋر بالىقتارىنىڭ نەدەن قىرىلعانى بەلگىلى بولدى

نۇر-سۇلتان. قازاقپارات - الماتى وبلىسىندا ىلە وزەنىندە موڭكە مەن اق امۋر بالىقتارىنىڭ قىرىلۋىنا گاز رەجيمىنىڭ دۇرىس بولماۋى سەبەپ.

بۇل جايىندا ورمان شارۋاشىلىعى جانە جانۋارلار الەمى كوميتەتىنەن ءمالىم ەتتى، دەپ حابارلايدى قازاقپارات ءتىلشىسى.

ۆەدومستۆو مالىمەتىنشە، 2020-جىلدىڭ 26- ساۋىرىندە «الماتى وبلىستىق ورمان شارۋاشىلىعى جانە جانۋارلار الەمى اۋماقتىق يسپەكتسياسى» ر م ك ينسپەكتورلارى ىلە وزەنىندە براكونەرلىك فاكتىلەردى انىقتاۋ جانە ولاردىڭ جولىن كەسۋگە باعىتتالعان شولعىنداۋ شارالارىن جۇرگىزگەن.

رەيد بارىسىندا د. قونايەۆ اتىنداعى كوپىر اۋماعىنان ءولى بالىقتاردى تاپقان. ولگەن موڭكە جانە اق امۋر بالىقتارىن سىرتتاي قاراۋ بارىسىندا ولاردىڭ قابىرشاقتارىنىڭ وزگەرگەنى انىقتالعان. وسىدان كەيىن ينسپەكتورلار بارلىق مۇددەلى مەملەكەتتىك ورگاندارعا حابار بەرىپ، 201 كەلى موڭكە جانە 152 كەلى اق امۋر بالىعىن جيناپ العان.

سونىمەن قاتار سۋدان جانە بالىقتان سىناما الىنىپ، «بالىق شارۋاشىلىعى عىلىمي-وندىرىستىك ورتالىعى» ج ش س بالقاش فيليالىنا جىبەرىلگەن.

«بالىق شارۋاشىلىعى عىلىمي- وندىرىستىك ورتالىعى» ج ش س بالقاش فيليالى قورىتىندىسىنا سايكەس، بالىقتاردىڭ قىرىلۋىنا ارنالاردىڭ ىشىندەگى اعىننىڭ بولماۋى، گاز رەجيمىنىڭ قاناعاتتانارلىقسىزدىعى، ۋلى حيميكاتتار سەبەپ بولعان. يممۋنيتەتى ءالسىز بالىقتار ارنا ىشىندە جۇرگەن كەزدە ءولىپ قالعان. كەيبىر بالىق سينەرگازيلەزگە شالدىققان»، - دەپ اتاپ وتەدى كوميتەتتەن.

ق ر ا ش م ۆەتەرينارلىق باقىلاۋ جانە قاداعالاۋ كوميتەتىنىڭ الماتى وبلىستىق اۋماقتىق ينسپەكتسياسىنىڭ ينسپەكتورلارى بالىق پەن سۋ سىناماسىن زەرتحانالىق زەرتتەۋ جۇرگىزۋ ءۇشىن الماتى قالاسىنا دا جىبەرگەن.

ۇلتتىق ۆەتەريناريا جونىندەگى رەفەرەنتتىك ورتالىقتىڭ الماتى فيليالى قورتىندىسىنا سايكەس، زەرتتەلگەن سىنامالاردىڭ قۇرامىندا كادمي، سىناپ، قورعاسىن، كۇشالا سىندى ۋلى ەلەمەنتتەر، تسەزي-137 جانە سترونتسي-90 سىندى راديونۋكليدتەر دەڭگەيى شەكتى نورمادان اسپاعان.

«بۇگىندە اتالعان ۋچاسكەدە بالىقتاردىڭ قايتادان قىرىلۋى انىقتالعان جوق»، - دەدى ۆەدموستۆودان.