ماقتاارالدا سۋ باسقان اۋىلداردان مىڭعا جۋىق مال ولەكسەسى شىعارىلدى

ماقتاارال. قازاقپارات - ماقتاارال اۋدانىنداعى سۋ باسقان اۋىلداردى تازالاۋ جۇمىسى ءجۇرىپ جاتىر. بۇل جونىندە تۇركىستان وبلىسى اۋىل شارۋاشىلىعى باسقارماسى ۆەتەريناريالىق شارالاردى ۇيىمداستىرۋ ءبولىمىنىڭ باس مامانى ارمان تاعايەۆ مالىمدەدى، دەپ حابارلايدى قازاقپارات ءتىلشىسى.

ارمان تاعايەۆتىڭ ايتۋىنشا، وڭىردە تاسقىن سۋدىڭ استىندا قالعان مال ولەكسەلەرى سىرتقا شىعارىلىپ، ارنايى پەشتە ورتەلۋدە. زياندى قالدىقتاردى 1200 گرادۋس تەمپەراتۋدا ورتەيتىن پەش نۇر- سۇلتان قالاسىنان جەتكىزىلگەن. بۇگىنگى كۇنگە دەيىن سۋ استىندا قالعان اۋىلداردان 908 باس ءۇي جانۋارىنىڭ ولەكسەسى شىعارىلدى.

ولاردىڭ ىشىندە 856 ۇساق مال بولسا، 39 ءىرى قارا جانە 7 جىلقى مەن 6 تۇيە بار. باس ماماننىڭ ايتۋىنشا، ولگەن مالدان تازارتىلعان اۋماقتاردى جاعىمسىز ءيىس پەن زياندى قالدىقتاردان ارىلتۋ ءۇشىن 219 توننا ءدارى سەبىلەدى. قازىرگى تاڭدا ول دارىلەردىڭ 100 تونناسى جەتكىزىلگەن. اۋا رايى قولايسىزدىق تۋدىرماسا، 5 كۇن ىشىندە 4 ميلليون 188 مىڭ شارشى مەتر اۋماق دارىلەنەدى دەپ جوسپارلانعان.

دەگەنمەن، سۋ استىنان شىققان مال ولەكسەسىنىڭ كوپشىلىگى وزبەكستان رەسپۋبليكاسىنا تيەسىلى بولعاندىقتان، ولارعا ارنايى مال اۋرۋلارىنا ارنالعان ۆاكسينا ەگىلگەنى جونىندە مالىمەت جوق. سوندىقتان، ماقتاارالداعى يتتەر كورشى ەلدەن سۋمەن اعىپ كەلگەن مال ولەكسەلەرىن جەپ، اۋرۋ تاراتۋ قاۋپى تۋىنداۋى مۇمكىن. بۇگىندە بۇل ايماقتاعى يتتەردىڭ دە كوزىن جويۋ جۇمىستارى قولعا الىنىپ، يەلەرىنە ەسكەرتۋ جاسالعان. بۇدان وزگە توپان سۋمەن بىرگە اعىپ كەلگەن بالىقتاردان دا سىناما الىنىپ، لابوراتوريالىق زەرتتەۋ جۇمىستارى جۇرگىزىلۋدە. زەرتتەۋ ناتيجەلەرى انىقتالعانشا جەرگىلىكتى تۇرعىندارعا بالىق اۋلاۋعا رۇقسات بەرىلمەيدى. بۇل جۇمىستاردىڭ بارلىعىنا ارنايى تەحنيكا جۇمىلدىرىلعان.

اتاپ وتەيىك، وبلىستىق اۋىل شارۋاشىلىعى باسقارماسى تاسقىن بولعان ەلدى مەكەندەردە تۇينەمە تىركەلمەگەنىن ايتقان بولاتىن.

اۆتور: اينۇر اقبايەۆا