تولەبيدە سۋ شايىپ كەتكەن كوپىرلەر ءبىر تاۋلىكتە قالپىنا كەلتىرىلدى
4 كوپىردى تولىق رەتكە كەلتىرۋ جۇمىستارى تىنىمسىز ءجۇرىپ جاتىر، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.
ناتيجەسىندە ەكى وتكەل تولىق رەتكە كەلتىرىلىپ، اۋىلدار اراسىنداعى بايلانىس اشىلدى. جولاۋشىلار كولىگى جانە اۆتوموبيل جولدارى باسقارماسىنىڭ باسشىسى رولان يبراگيموۆتىڭ مالىمدەۋىنشە، قايتا قالپىنا كەلتىرۋ جۇمىستارى قىسقا مەرزىمدە جۇزەگە اسادى.
«ورتاشا جوندەۋ جۇمىستارى تىنىمسىز جۇرگىزىلىپ جاتىر. قاسقاسۋ ەلدىمەكەنىندەگى شايىلعان قۇبىرلاردى قالپىنا كەلتىرۋ ماقساتىندا ءتيىستى تەحنيكا جۇمىلدىرىلىپ، ماتەريالدار جەتكىزىلدى. 4 كوپىردىڭ ەكەۋى ءبىر كۇندە قالپىنا كەلتىرىلدى. تاعى ءبىرى رەتتەلىپ، جاياۋ جۇرگىنشىلەر ءۇشىن اشىلدى. ەرتەڭگە دەيىن اياقتاپ، كولىك ءجۇرۋ ءۇشىن اشامىز. سوڭعىسىنا قاتىستى جۇمىستار قارجى ماسەلەسىنىڭ شەشىلۋىن تالاپ ەتەدى. سونداي- اق بۇل جۇمىسقا 20 تەحنيكا جانە 21 جۇمىسشى جۇمىلدىرىلدى»، - دەدى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى رولان يبراگيموۆ.
سونىمەن قاتار تولەبي اۋدانىنىڭ قاسقاسۋ، كەڭەسارىق، قوساعاش، ەكپىندى، بىركولىك، كيەلىتاس، دوستىق اۋىلدارى مەن لەڭگىر قالاسىنىڭ اۋماعىندا ورنالاسقان ەلدى مەكەندەرىندە جاڭبىر سۋى جينالعان. جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە، اتالعان ەلدى مەكەندەردەن وتەتىن اۋداندىق ماڭىزى بار جولدار مەن اۋىل كوشەلەرىنەن بولەك، ءبىرقاتار وبلىستىق ماڭىزى بار جولدارعا دا زاقىم كەلگەن.
ەسكە سالا كەتەيىك، تۇركىستان وبلىسىنىڭ تولەبي، قازىعۇرت، بايدىبەك اۋداندارىندا نوسەر جاۋىننان كەيىن سەل ءجۇرىپ، ءۇي اۋلالارى مەن كوپىرلەردى سۋ الىپ كەتكەن ەدى.
