پويىز قوزعالىسىن جانداندىرۋ: كولىكتەگى باس سانيتارلىق دارىگەر نەگىزگى تالاپتاردى اتادى
«ءتيىستى قاۋلىدا تەمىرجول ۆوكزالدارىنىڭ باسشىلىعى، تاسىمالداۋشىلار مەن جولاۋشى تاسىمالداۋدا قىزمەت كورسەتەتىن ۇيىمدار قامتاماسىز ەتۋى ءتيىس باستى شارالار ايقىندالدى. ونىڭ ىشىندەگى نەگىزگىلەرىنە توقتالساق، ۆوكزال عيماراتىنا كىرەر الدىندا جولاۋشىلاردا مەديتسينالىق ماسكا مەن جول ءجۇرۋ بيلەتى بولۋى كەرەك. سونىمەن قاتار، عيماراتقا كىرەر كەزدە ۆوكزالدىڭ وزىندىك قاۋىپسىزدىك قىزمەتى تەرمومەتريا جۇرگىزەتىن بولادى»، - دەدى س. بايعابىلوۆ ورتالىق كوممۋنيكاتسيالار قىزمەتىندە.
ونىڭ سوزىنە قاراعاندا، تەمىرجول ۆوكزالدارى جۇمىسىن جانداندىرۋ مەن ۆاگونداردىڭ قوزعالىسىن قامتاماسىز ەتۋ الدىندا كونديتسيونەرلەۋ جۇيەسى تولىق تەكسەرىلىپ، فيلترلەر اۋىستىرىلادى.
«پويىزداردا دەزينفەكتسيالىق رەجيمدى كۇشەيتۋ ماڭىزدى تالاپتاردىڭ ءبىرى بولادى. مۇنىمەن قوسا، پويىز بريگادالارى، قىزمەتكەرلەر ماسكامەن ءجۇرۋى كەرەك. ۆاگوندار اراسىندا جولاۋشىلاردىڭ قوزعالىسىنا شەكتەۋ ەنگىزىلەدى» ، - دەدى ول. بەلگىلى بولعانداي، جولاۋشىلاردى شىعارىپ سالۋعا بىرگە ىلەسىپ كەلگەن ادامدار ۆوكزال عيماراتىنا كىرگىزىلمەيدى.
«ۆاگونداردا جولاۋشىلاردى وتىرعىزۋ بيلەت پەن ورنالاستىرۋ ورىندارىنىڭ بولۋىنا قاراي ىسكە اسىرىلادى. ادامداردى ورىندارىنا وتىرعىزۋ بويىنشا قوسىمشا تالاپتار ەسكەرىلمەگەن. كۋپە جانە پلاتسكارت ۆاگوندارىندا تەك بيلەتتەر بويىنشا وتىرعىزىلادى»، - دەدى س. بايعابىلوۆ.
ونىڭ سوزىنە قاراعاندا، جولاۋشىلاردى ورنالاستىرۋ ستاندارتتى تارتىپتە ىسكە اسىرىلادى. «ماسكا تاعۋ رەجيمىن، ادامداردىڭ قوزعالىسىن، پويىزداردا ادامداردىڭ تىعىز توپتاسپاۋىنا جول بەرمەۋدى قاداعالاۋ ماسەلەلەلەرىن جولسەرىكتەر رەتتەيدى» ، - دەدى ول. سونىمەن قاتار جولاۋشىلار وزدەرىمەن بىرگە قاجەتتى تاماعىن الىپ جۇرە الاتىنىن جەتكىزدى.
