مەنىڭ دە جاۋاپكەرشىلىگىم بار - تىلەۋحان ابىلدايەۆ دارىگەرلەردىڭ كوروناۆيرۋس جۇقتىرۋىنا قاتىستى
«مەن دارىگەرلەردى ايىپتاي المايمىن. الايدا، ەگەر قاۋىپسىزدىك شارالارىن دۇرىس ساقتانسا، قىزمەتكەرلەر جاپپاي جۇقتىرماس ەدى. بۇل - قالامىزداعى ءىرى اۋرۋحانالاردىڭ ءبىرى. مۇندا كوبىنەسە پاتسيەنتتەر شۇعىل جەتكىزىلەدى. بىزدە ناۋقاستاردىڭ كوپشىلىگى كوروناۆيرۋسپەن اۋىرعانى بەلگىسىز ءوتتى. سوقىرىشەك، پانكرەاتيت، حولەتسيستيتپەن اۋىرىپ تۇسكەن ناۋقاستاردى COVID-19 جۇقتىرعانداردان اجىراتۋ مۇمكىن بولمادى. شۇعىل ستاتسيونار جاعدايىندا جۇمىس ىستەپ جۇرگەن قىزمەتكەرلەر جۇقتىرۋى مۇمكىن. بۇل جاعدايدا مىندەتتى تۇردە تەرەڭ ەپيدەميولوگيالىق تەكسەرۋ جۇرگىزىلۋى ءتيىستى. سوسىن قالا اكىمىنىڭ ورىنباسارى ەرجان باباقۇماروۆ باستاعان كوميسسيا شەشىم شىعارادى» ، - دەدى ت. ابىلدايەۆ.
ونىڭ ايتۋىنشا، قازىر قالاداعى بارلىق اۋرۋحانالار مەن ەمحانالار پروۆيزورلىق ەمحانا رەجيمىندە جۇمىس ىستەپ جاتىر. باسقارما باسشىسى بۇل وقيعاعا ءوزىنىڭ دە جاۋاپتى ەكەنىن جەتكىزدى.
«مەن باسقارما باسشىسى رەتىندە ءوزىمنىڭ دە جاۋاپتى ەكەنىمدى بىلەمىن» ، - دەدى ول. ونىڭ ايتۋىنشا، مۇنداي وقيعا الەمنىڭ بارلىق ەلدەرىندە بولىپ جاتىر.
«قازىر بۇل ينفەكتسيانىڭ وتە جۇقپالى ەكەندىگىن قازاقستاندا عانا ەمەس الەم بويىنشا كورىپ وتىرمىز. ءتىپتى دامىعان ەلدەردە جاي ادامداردىڭ دا، مەديتسينا ماماندارىنىڭ دا اراسىندا جۇقتىرۋ تىركەلىپ جاتىر. ءبىز وزىمىزگە قاجەتتى تاجىريبە جيناپ جاتىرمىز. بولاشاقتا بۇل باسقا ينفەكتسيالارمەن كۇرەستە سەپتىگىن تيگىزبەك. مەنىڭ ويىمشا، ءبىزدىڭ دارىگەرلەردىڭ بىلىكتىلىگى ارتا تۇسەدى»، - دەدى تىلەۋحان ابىلدايەۆ.
