قازاقستاندا كۇننىڭ ىسۋى كوروناۆيرۋستىڭ تارالۋىنا قالاي اسەر ەتەدى
بۇل سۇراققا دەنساۋلىق ساقتاۋ Facebook پاراقشاسىنداعى سۇحبات بارىسىندا قازاقستاننىڭ جەتەكشى ينفەكتسيونيست دارىگەرى، مەديتسينا عىلىمدارىنىڭ دوكتورى ديناگۇل باەشيەۆا جاۋاپ بەردى، دەپ حابارلايدى قازاقپارات ءتىلشىسى.
«ۋلتراكۇلگىندى ساۋلەلەر پاتوگەندى ۆيرۋستار مەن باكتەريالاردىڭ كوبىن ولتىرەدى. ياعني ءسوزسىز كۇننىڭ ىسۋىنىڭ جاعىمدى اسەرى مول. جىلى اۋا رايىنىڭ ءوزى دە ادامدارعا جايلى اسەر ەتەدى. ادامدار كوشەگە شىعادى، تازا اۋامەن دەمالىپ، ءتورت قابىرعاعا قامالىپ وتىرمايدى. ەسىك پەن تەرەزە اشىلىپ، بولمە جەلدەتىلەدى. مۇنىڭ ءبارى جاقسى»، - دەدى ديناگۇل باەشيەۆا.
ماماننىڭ ايتۋىنشا، بۇل رەتتە باستى شارتتاردىڭ ءبىرى - الەۋمەتتىك قاشىقتىقتى ساقتاۋ، بارىنشا 1-2 مەتر ارالىقتا ءجۇرۋ.
«ۆيرۋس ادامداردىڭ جوعارى تىنىس الۋ جولدارى ارقىلى تارالاتىنىن ءتۇسىنۋ كەرەك. سەبەبى ول جەرگە ۋلتراكۇلگىندى ساۋلە جەتە المايدى. ماسەلەنىڭ ءمانىسى وسىندا. ءبىزدىڭ مىندەت - وسى ۆيرۋستىڭ تارالۋىنا جول بەرمەۋ» ، - دەيدى ول.
