ورداباسى اۋدانىندا ارىس- شىمكەنت باعىتىنداعى كوپىردى سۋ شايىپ كەتتى
بۇل تۋرالى ارىس قالاسىنىڭ اكىمدىگى رەسمي تۇردە حابارلاپ، جۇرگىزۋشىلەرگە بۇل جولدىڭ جابىلعانىن ەسكەرتتى، دەپ حابارلايدى قازاقپارات ءتىلشىسى.
«ارىس قالاسى مەن كورشىلەس ورداباسى اۋدانى قاراسپان (وبرۋچيەۆكا) اۋىلىنداعى بادام وزەنىنىڭ ۇستىنەن سالىنعان ۋاقىتشا كوپىردى سۋ باستى. ارىس- شىمكەنت باعىتىنداعى جولدىڭ ۇستىندەگى كوپىردى سۋ باسۋىنان بارلىق كولىك قوزعالىسى شەكتەلدى. اتالعان سەبەپتەرگە بايلانىستى ارىس- شىمكەنت باعىتىنداعى كولىكتەردىڭ ءوتۋ مۇمكىندىگى جوق ەكەندىگىن نازارلارىڭىزعا جەتكىزەمىز. شىمكەنت قالاسىنا شۇعىل تۇردە باراتىن ارنايى رۇقساتى بار كولىك جۇرگىزۋشىلەرىنىڭ نازارىنا، مونتايتاس- بادام- شىمكەنت باعىتىمەن ءجۇرۋ ۇسىنىلادى»، دەلىنگەن ارىس قالاسى اكىمىنىڭ حابارلاماسىندا.
ايتا كەتەيىك، كۇنى كەشە قاتتى نوسەر جاۋىننان قاسقاسۋ وزەنى ارناسىنان اسىپ كەتكەن بولاتىن. سالدارىنان تولەبي اۋدانىنداعى 4 كوپىردى دە سۋ شايىپ، جوعارى قاسقاسۋ اۋىلىنىڭ ىشكى جولدارى جابىلىپ قالعان ەدى.
