اقتوبەدە اسكەري قىزمەتكەرلەردەن كوروناۆيرۋس ينفەكتسياسى تابىلدى
اقتوبە وبلىسى بويىنشا بارلىعى 185 ادام ىندەتكە شالدىقسا، ونىڭ 55 ءى ەمدەلىپ، ۇيىنە شىعارىلدى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا، قالادا كوپقاباتتى ۇيلەردىڭ 51 پودەزى جابىلىپ، ادامدار ۇيدە كارانتيندە بولدى. ولاردى قايتا تەكسەرۋ كەزىندە تاعى 3 ادامنىڭ ىندەتكە شالدىققانى انىقتالدى. بارلىعى ينفەكتسيالىق اۋرۋحاناعا جاتقىزىلدى.
«كوروناۆيرۋس ينفەكتسياسىمەن كۇرەس جۇمىستارىنا جۇمىلدىرىلعان ەكى اسكەري قىزمەتكەر دە ۆيرۋس جۇقتىردى. سونىمەن بىرگە وڭىردەگى ءىرى مۇناي كومپانيالارى ۆاحتالىق ادىسپەن جۇمىس ىستەيتىن ادامداردى جوسپارلى تۇردە تەكسەرۋدەن وتكىزىپ جاتىر. مەديتسينالىق تەكسەرۋ كەزىندە سول ادامداردىڭ بىرىنەن ۆيرۋس انىقتالدى. ول بۇرىن ىندەت جۇقتىرعان اداممەن بايلانىستا بولعان ەكەن. تاعى ەكى ادام ناۋقاستارمەن بايلانىسىپ، ىندەتكە شالدىققان. سوڭعى انىقتالعان 8 ادامنىڭ ەكەۋى - بالا. ءبىرى – 8، ەكىنشىسى - 1 جاستا. ناۋقاستاردىڭ جاعدايى ءبىرقالىپتى» ، - دەدى اسەت قاليەۆ.
