تۇركيا ماۋسىم ايىنان باستاپ تۋريستەردى قابىلدايدى
ەلدىڭ مادەنيەت جانە تۋريزم ءمينيسترى مەحمەت نۋري ەرسوي ساياحاتشىلاردى قابىلدايتىن قوناقۇيلەر «سالاۋاتتى تۋريزم» سەرتيفيكاتتارىن الۋى ءتيىس.
مەرۋەرت قاناعات، ءتىلشى:
- ماۋسىم ايىنان باستاپ انتاليا جاعالاۋىنداعى قوناق ۇيلەر دەمالۋشىلاردى قابىلداي باستايدى. ۇيرەنشىكتى ستاندارتتىق، suit, ليۋكس، جانە پاتشالىق جاتىن بولمەلەرىمەن قوسا تاعى ءبىر بولمە ىسكە قوسىلماق. «وقشاۋلاۋ بولمەسى» . كوروناۆيرۋسقا شالدىققان ناۋقاستار ءبىرىنشى وسى بولمەگە ورنالاستىرىلىپ، العاشقى مەديتسينالىق جاردەمدى الادى. مۇندا ناۋقاستار قان قىسىمى، دەنە قىزۋى جانە جۇرەك سوعۋى سىندى كومەكپەن بىرگە، قاجەت بولعان جاعدايدا جاساندى جەلدەتكىشتەرگە قوسىلادى. وقشاۋلاۋ بولمەسى تاۋلىك بويى قىزمەت كورسەتەدى. مۇندا ارنايى دارىگەرلەر مەن مەدبيكەلەر تۇراقتى تۇردە كەزەكتە تۇرادى. ءتارتىپ تابالدىرىقتان. «حابار 24» ارناسىنا ارنايى ەسىك اشقان قوناق ءۇيدىڭ باس ديرەكتورى الي قىزىلداع، كوروناۆيرۋس كەزەڭىندە قابىلدانعان شارالاردى وسىلاي اتايدى. اۋەجايدان كولىكپەن جەتكىزىلگەن ساياحاتشىنىڭ جۇكتەرى قوناق ۇيدە ارنايى سۇيىقتىقپەن تازالانادى. قوناقتار كىرە بەرىستە ورناتىلعان «دەزينفەكتسيا تۋننەلىنەن» ءوتىپ، تەرمال كامەرالارمەن دەنە قىزۋى ولشەنەدى. بيىل دەمالۋشىلارعا ەشقانداي كىلت جانە باسقا قۇرالدار بەرىلمەيدى. بارلىق قىزمەت بايلانىسسىز جۇمىس ىستەيدى. مىسالى، رەسەپشنداعى پەرسونال- تۋريستتەرگە ارنايى اينەكتەن جاسالعان قالقان ارقاسىندا قىزمەت كورسەتەدى. تىركەۋ دە QR كود ارقىلى جاسالادى. وسى QR كود ارقىلى بولمەدەگى بارلىق ەلەكتروندى قۇرىلعىلار باسقارىلادى.
سەلدا جەمبۋش، قوناق ءۇي پەرسونالى:
- جاستىقتارىمىز سۇيىقتىق وتكىزبەيتىن ارنايى ماتامەن قاپتالعان. تەلەديداردى قاشىقتىقتان باسقاراتىن ءپۋلتىمىز دە پلاستيكالىق پاكەتپەن قورعالعان. ەسىكتى اشىپ- جابۋ، ەلەكتر ەنەرگياسىن قوسىپ- ءوشىرۋ سەكىلدى قىزمەتتەر دە ۇيالى تەلەفونعا جۇكتەلگەن قوسىمشا ارقىلى باسقارىلادى. تۇرىك دەمالىس ورىندارىندا، all inclusive ياعني «ءبارى باعاعا قوسىلعان» قىزمەتى جالعاسادى. تەك اسحاناداعى شۆەد ۇستەلىنە وزگەرىستەر ەنگىزىلدى. ەندى تۇتىنۋشى قالاعان تاماعىن داياشى ارقىلى الادى. مۇندا دا اراقاشىقتىقتى ساقتاۋ شارت. سونداي- اق الەۋمەتتىك قاشىقتىق حاۋىز، جاعالاۋ ورىندارىندا دا ساقتالادى.
الي كىزىلداع، قوناق ءۇيدىڭ باس ديرەكتورى:
- مينيسترلىگىمىزدىڭ بەكىتكەن ەرەجەلەرىن ورىندادىق. COVID-19 كەزىندە تۋريزم سالاسىنداعى الەمدىك وزىق تاجىريبەلەردى الۋعا تىرىستىق. قوسىمشا قۇرىلعىلار الۋىمىزعا تۋرا كەلدى. باستىسى، كاسىپورىنىمىزدىڭ ىسكە قوسىلۋى مەن قوناقتارىمىزدىڭ قاۋىپسىزدىگى. بۇل كەزەڭدە بولمەلەرىمىزدىڭ تەك %50 عانا قىزمەت كورسەتەدى. اراقاشىقتىقتى ساقتاۋ تۇرعىسىنان بۇل اسا ماڭىزدى. ەلدە تۋريزم نەگىزىنەن ناۋرىز ايىنان باستالاتىن. الايدا، الەمدى شارپىعان ىندەت بۇل سالاعا قاتتى اسەر ەتتى. ارينە، مەملەكەت قولداۋ كورسەتتى. ءبىرقاتار سالىقتار مەن وتەمدەردى كەيىنگە قالدىرىپ، قوناقۇي قىزمەتكەرلەرىنىڭ %70 جالاقىسىن تولەدى. دەگەنمەن كاسىپ يەلەرى تۇتىنۋشىلارعا بۇرىنعىشا قىزمەت كورسەتىپ، تابىسىنىڭ ارتقانىن قالايدى. تىرلىگى تۇرالاعان كاسىپكەرلەر كوروناۆيرۋستىڭ كەلمەسكە كەتەتىن كۇنىن تاعاتسىزدانا كۇتىپ وتىر. اۆتورلارى: مەرۋەرت قاناعات، گوكالپ يامەن
