قازاقستاندا دەنە شىنىقتىرۋ مۇعالىمدەرىنە قوسىمشا اقى تولەنۋى مۇمكىن
بۇل تۋرالى ق ر مادەنيەت جانە سپورت ءمينيسترى اقتوتى رايىمقۇلوۆا ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ 2019 -جىلعى قازاقستان حالقىنا جولداۋىن ىسكە اسىرۋ بويىنشا جالپىۇلتتىق ءىس- شارالار جوسپارىنىڭ 64-تارماعىن ورىنداۋ اياسىندا دەنە شىنىقتىرۋ جانە بۇقارالىق سپورتتى دامىتۋ جونىندەگى 2020-2025 -جىلعا ارنالعان كەشەندى جوسپارى ازىرلەندى. بۇل جوسپاردا مۇددەلى مەملەكەتتىك ورگانداردىڭ، جەرگىلىكتى اتقارۋشى ورگانداردىڭ ۇسىنىستارى تولىق ەسكەرىلىپ، قر پرەمەر- مينيسترىمەن بەكىتىلدى. 2016 -جىلى ەلباسى نۇرسۇلتان ءابىش ۇلى نازاربايەۆ ءوزىنىڭ جارلىعىمەن حالىقتى دەنە شىنىقتىرۋ جانە سپورتپەن جۇيەلى تۇردە شۇعىلدانۋعا تارتۋ دەڭگەيىن %35 عا دەيىن ارتتىرۋدى تاپسىرعان بولاتىن. بۇل كەشەندى جوسپار وسى كورسەتكىشكە قول جەتكىزۋدى جانە حالىقتىڭ دەنە شىنىقتىرۋ مەن سپورتپەن اينالىسۋى ارقىلى سالاۋاتتى ءومىر سالتىنا ۇمتىلىسىن قالىپتاستىرۋدى كوزدەيدى»، - دەدى مينيستر ورتالىق كوممۋنيكاتسيالار قىزمەتىندەگى ونلاين باسپا ءسوز ءماسليحاتىندا.
بۇل تۇرعىدا حالىقتىڭ بارلىق جاس ساناتتارى اراسىندا دەنە شىنىقتىرۋ مەن بۇقارالىق سپورتتى دامىتۋدى جانە بالالار ءۇشىن سپورتتىق ينفراقۇرىلىمعا بارىنشا قول جەتكىزۋ جونىندەگى شارالار قامتىلعان. كەشەندى جوسپار 34 تارماق پەن 5 نەگىزگى باعىتتان تۇرادى: نورماتيۆتىك- قۇقىقتىق قامتاماسىز ەتۋ، مەكتەپ جانە ستۋدەنتتىك سپورت، سپورت جەلىلەرىن كەڭەيتۋ، سالاۋاتتى ءومىر سالتىن ناسيحاتتاۋ جانە كەڭىنەن تاراتۋ، سپورتتىق- بۇقارالىق ءىس-شارالارى. بۇقارالىق سپورتتى دامىتۋ، سونداي- اق دەنە شىنىقتىرۋمەن جانە سپورتپەن شۇعىلداناتىنداردىڭ سانىن ارتتىرۋ ماقساتىندا كەشەندى جوسپاردا نەگىزگى باعىتتار بويىنشا قازاقستان رەسپۋبليكاسىنىڭ 8 زاڭنامالىق اكتىسىنە 33 تۇزەتۋ ەنگىزە وتىرىپ، بۇقارالىق سپورت جونىندەگى زاڭ جوباسى پارلامەنت ماجىلىسىنە ەنگىزىلدى.
«زاڭ جوباسىنا دەنە شىنىقتىرۋ مۇعالىمدەرىنە ساباقتان تىس سپورت ساباقتارىن جۇرگىزگەنى ءۇشىن بازالىق لاۋازىمدىق جالاقىدان 100 پايىز مولشەرىندە قوسىمشا اقى ەنگىزىلىپ وتىر. سونداي-اق، زاڭ جوباسىندا ۇلتتىق سپورت تۇرلەرىن دامىتۋ بويىنشا شارالار كوزدەلگەن. ءبىلىم بەرۋدىڭ بارلىق دەڭگەيلەرىندە دەنە تاربيەسى بويىنشا ساباقتاردا دەنە شىنىقتىرۋ جانە سپورت سالاسىنداعى ۋاكىلەتتى ورگان بەكىتكەن تىزبەگە سايكەس، ۇلتتىق سپورت تۇرلەرى بويىنشا مىندەتتى كومپونەنت كوزدەلىپ وتىر»، - دەدى اقتوتى رايىمقۇلوۆا.
