بوكستان ەرلەر قۇراماسى الماتىدا وقۋ-جاتتىعۋ جيىنىن وتكىزەدى
بۇل ەلىمىزدە كوروناۆيرۋس ينفەكتسياسىنا بايلانىستى جاريالانعان توتەنشە جاعداي رەجيمىنەن كەيىنگى العاشقى وقۋ-جاتتىعۋ جيىنى بولادى.
«جاتتىعۋ جۇمىستارى ارنايى فيزيكالىق دايىندىق باعدارلاماسى نەگىزىندە جۇرگىزىلەدى. اتالعان شارا سانيتارلىق-گيگيەنالىق تالاپتار بويىنشا اتقارىلادى. ياعني، ۇلتتىق قۇراما دايىندىعىنا 30 سپورتشىدان ارتىق شاقىرىلمايدى. توتەنشە جاعداي كەزىندە بوكسشىلار ونلاين نەگىزدە جاتتىعۋ جاسادى. توتەنشە جاعداي رەجيمىنىڭ جەڭىلدەتىلۋىنە بايلانىستى قازىر بەلسەندى تۇردە جاتتىعۋ جۇرگىزۋدە. ولار 25 مامىرداعى وقۋ-جاتتىعۋ شاراسىنا ازىرلىگىن پىسىقتاۋدا. الداعى ۋاقىتتا ۋكراينا، رەسەي، وزبەكستان قۇرامالارىمەن بىرلەسكەن وقۋ-جاتتىعۋ جيىندارىن وتكىزۋ جوسپارلانىپ وتىر. سونداي-اق، كۇز مەزگىلىندە قازاقستان بىرىنشىلىگىن ۇيىمداستىرۋ ويلاستىرىلۋدا. بوكسشىلار حالىقارالىق وليمپيادا كوميتەتىنىڭ كۇنتىزبەسىندە كورسەتىلگەن حالىقارالىق تۋرنيرلەردە شەبەرلىگىن جەتىلدىرە تۇسەدى دەگەن ويدامىز»، - دەدى ۇلتتىق قۇرامانىڭ باس باپكەرى عالىمبەك كەنجەبايەۆ.
بۇدان بۇرىن بوكستان ەرلەر اراسىنداعى 2021-جىلعى الەم چەمپيوناتى وتەتىن قالا انىقتالعان بولاتىن.
