بەلگىلى كومپوزيتور، «ساعىندىم ساعىم جىلدار»، «كۇرەڭ كۇز» اندەرىنىڭ اۆتورى ومىردەن وزدى
ق. قۋانىشبايەۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى، رەجيسسەر اسحات ماەميروۆ Facebook پاراقشاسىندا ءمالىم ەتكەندەي، گۇلنار داۋكەنوۆا الاشتىڭ ومىرشەڭ اندەرىمەن، كوكەيكەستى كۇيلەرىمەن تەربەگەن ءانشى- كومپوزيتور ەدى.
حالىق اراسىنا كەڭىنەن تانىلعان «ساعىندىم ساعىم جىلدار»، «كۇرەڭ كۇز»، «قايران ۋاقىت»، «شىڭداعى شىنارىم- اي»، «ءمولدىر سەزىم» سەكىلدى كوپتەگەن اندەردىڭ اۆتورى گۇلنار داۋكەنوۆانىڭ تۋىندىلارى دا ءوزىنىڭ جان دۇنيەسى سەكىلدى شىنايىلىققا، سىرشىلدىققا، ليريزمگە تولى بولاتىن. شيرەك عاسىردان استام ۋاقىت ۇلتتىق مۋزىكامىزدىڭ قارا شاڭىراعى - قۇرمانعازى وركەسترىندە ەڭبەك ەتتى.
ەلىمىز تاۋەلسىزدىگىن العان تۇستا ۇلكەن تولعانىستان تۋعان «جاساي بەر، قازاقستانىم!» كۇيى كوپتەگەن وركەسترلەردىڭ رەپەرتۋارىنىڭ التىن قورىنا ەندى. ەلگە دەگەن ماحابباتىن انمەن، كۇيمەن ورنەكتەگەن گۇلنار داۋكەنوۆا ومىردە كىشىلىك پەن كىسىلىكتى، ادالدىق پەن مەيىرىمدى، ادامگەرشىلىك اسىل قاسيەتتەردى تۋ ەتتى.
كوپتەگەن اندەرى مارقۇم ءمادينا ەرالييەۆا شىعارماشىلىعىنىڭ بويتۇمارىنا اينالدى. حالىق ارتىستەرى ن. ءنۇسىپجانوۆ، ر. رىمبايەۆا، م. ءجۇنىسوۆا جانە ا. قوسانوۆا، گ. داۋىربايەۆا، م. تۇسىپبايەۆا، ا. يمانباي، گ. ورازىمبەتوۆا، ا. كەرىمبەكوۆا، ميراس پەن قۇرالاي، «جىگىتتەر» كۆارتەتى، «كەشيۋ» توپتارىنىڭ رەپەتۋارىنان گ. داۋكەنوۆانىڭ اندەرى بەرىك ورىن الدى. ونەر الەمىندە وزىندىك ورنى، ءوز بيىگى بار گۇلنار داۋكەنوۆا ءۇرجاردىڭ قاسيەتتى توپىراعىنان تۇلەپ ۇشىپ، شىعىستىڭ شىنارى اتاندى.
«گۇلنار اپكە اقجارقىن جەڭگەمىز، اق جايىق ءوڭىرىنىڭ سىيلى كەلىنى ەدى. تاعدىر قوسقان سەرىگى دونەدىل قاجىموۆ تا - ەلىمىزگە تانىمال ءانشى- كومپوزيتور، قازاقستاننىڭ ەڭبەك سىڭىرگەن قايراتكەرى. «تاس تۇسكەن جەرىنە اۋىر» دەيدى بابالارىمىز، دونەدىل اعامىزعا قايعىرىپ كوڭىل ايتامىز. قوش بولىڭىز، شىڭداعى شىنار سىندى گۇلنار اپكە، گۇلنار جەڭەشە! ساعىم جىلداردىڭ ىشىندە ءسىزدى ساعىنعان شاقتاردا، ءار قازاقتىڭ جۇرەگىندە ءسىزدىڭ اندەرىڭىز جۇرەتىنىنە سەنەمىن! يمانىڭىز جولداس بولسىن، اياۋلى گۇلنار جەڭەشە، گۇلنار اپكە!» - دەپ جازدى اسحات ماەميروۆ.
اۆتور: ەلجان ەرالى
