كوروناۆيرۋس گەنومى قازاقستاندا زەرتتەلەدى

نۇر- سۇلتان. قازاقپارات - قازاقستان كوروناۆيرۋس گەنومىن زەرتتەۋدى قولعا الماق. بۇل تۋرالى ق ر د س م قوعامدىق دەنساۋلىق ساقتاۋ ۇلتتىق ورتالىعى ديرەكتورىنىڭ ورىنباسارى سەرجان ايدوسوۆ ايتتى، دەپ حابارلايدى قازاقپارات ءتىلشىسى.

«بىزدە كوروناۆيرۋس ينفەكتسياسىنىڭ العاشقى جاعدايى مەن ولاردىڭ بايلانىستارىن زەرتتەۋ جۇرگىزىلەدى. بۇل - دۇنيەجۇزىلىك دەنساۋلىق ساقتاۋ ۇيىمىنىڭ جوباسى. ول بىزگە ۆيرۋس شتاممىن، سونىمەن قاتار حالىق اراسىندا ۆيرۋستىڭ تارالۋ بارىسىن، قالاي تارالعانىن، قانداي فاكتورلار ىقپال ەتكەنىن زەردەلەۋگە مۇمكىندىك بەرەدى. جوعارى وقۋ ورىندارى ماماندارى جانە عالىمدارى زەردەلەگەننەن كەيىنگى ناتيجەنى 1-2 ايدىڭ ىشىندە دەنساۋلىق ساقتاۋ مينيسترلىگىنە تابىستايمىز»، - دەدى سەرجان ايدوسوۆ «دەنساۋلىق ساقتاۋ مينيسترلىگى حابارلايدى» باعدارلاماسى بارىسىندا.

سونىمەن قاتار ول «ىنتىماقتاستىق» دەپ اتالاتىن جاھاندىق جوبا اياسىندا 4 پرەپارات زەرتتەلەتىنىن جانە ونىڭ ۇشەۋى ەلىمىزدە تىركەلگەنىن اتاپ ءوتتى.

«ءبىز 90 ەلدىڭ قاتارىندا وسى جوباعا قاتىسۋعا نيەت تانىتقان ەدىك. قازىرگى ۋاقىتتا جوبا 10 ەلدە باستالىپ كەتتى. بىزدەگى جاعداي قانداي؟ ءبىز بيوادەپ ورتالىق كوميسسياسىنان وتتىك. كوميسسيا مۇشەلەرى جوبانى بەكىتتى. قازىرگى ۋاقىتتا ۇلتتىق ساراپتاما ورتالىعىنىڭ باعاسىن الىپ جاتىرمىز. وتە كوپ قۇجات قاجەت، تولىق ءتىزىمى شامامەن 300-500 بەت بولادى. ءبىز وسى قۇجاتتاردى جيناپ، دالەلدەگەننەن كەيىن باستايمىز دەپ ويلايمىن» ، - دەدى ول. سونىمەن قاتار ول قوعامدىق دەنساۋلىق ساقتاۋ ۇلتتىق ورتالىعى ۆيرۋس گەنومىن زەردەلەۋگە نيەت تانىتىپ وتىرعانىن ايتتى.

«كەلەسى جوبا اياسىندا ۆيرۋس گەنومىن، سونداي- اق كوروناۆيرۋس جۇقتىرعان پاتسيەنتتەردىڭ گەنومىن زەردەلەمەكپىز. مۇنداي گەنەتيكالىق زەرتتەۋدى ءبىزدىڭ زەرتحانا نازاربايەۆ ۋنيۆەرسيتەتىمەن بىرگە جۇرگىزەدى»، - دەدى س. ايدوسوۆ.