ەكپەلەر مىندەتتى جانە ەرىكتى بولىپ بولىنەدى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» قازاقستان رەسپۋبليكاسى كودەكسىنىڭ جوباسى ەكىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

«قورىتىندى سالىستىرمالى كەستە 717 قابىلدانعان تۇزەتۋدى قامتىدى، ەكى تۇزەتۋ قابىلدانبادى»، - دەدى دەپۋتات زاۋرەش امانجولوۆا.

وسى ورايدا اتالعان ەكى تۇزەتۋدىڭ ءبىرىنشىسى پروفيلاكتيكالىق ەكپەلەردى جۇرگىزۋ بويىنشا پۋنكتە «مىندەتتى» ءسوزىن «قۇقىلى» دەگەن سوزگە اۋىستىرۋعا قاتىستى بولدى. ال ەكىنشى تۇزەتۋ ەكپە جاسالماعان بالالاردىڭ بالاباقشاعا بارۋىن شەكتەيتىن نورمانى جويۋعا بايلانىستى. دەگەنمەن بۇل تۇزەتۋلەر قابىلدانبادى.

«ناتيجەسىندە، بارلىق ەكپەلەر مىندەتتى جانە ەرىكتى بولىپ ناقتى بولىنەدى، ال بالالاردىڭ بالاباقشاعا بارۋى وسى ۇيىمداعى «ۇجىمدىق يممۋنيتەتتىڭ» دەڭگەيىنە قاراي جۇزەگە اسىرىلادى دەگەن شەشىم قابىلداندى»، - دەدى زاۋرەش امانجولوۆا.

بۇدان بۇرىن حابارلانعانداي، بيىل 4-ناۋرىزدا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسى ءبىرىنشى وقىلىمدا ماقۇلدانعان ەدى.