ويىن بيزنەسى سالاسىنداعى باقىلاۋ كۇشەيتىلەدى - نۇرلان نىعماتۋلين
بۇگىن پالاتانىڭ جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
وسى زاڭ جوباسى بويىنشا دەپۋتاتتار كوپتەگەن ماڭىزدى تۇزەتۋلەر ەنگىزدى.
«شىن مانىندە، يگرومانيا اۋرۋعا جاتاتىن نارسە. وعان ۇيرەنگەن ادام ونى ءوز كۇشىمەن جەڭە المايدى. سوندىقتان، دەپۋتاتتار جاڭا نورما ەنگىزىپ وتىر. ول بويىنشا يگرومانياعا بەرىلگەن ازاماتتى ودان شىعارۋ ءۇشىن تۋىسقاندارى سوتقا بەرە الادى. بۇل قاجەتتى جانە ءتيىمدى نورما دەپ ەسەپتەيمىن»، - دەدى ن. نىعماتۋلين.
بۇل تۇرعىدا ءماجىلىس ءتوراعاسى سالاداعى نورمالار، حالىقارالىق تاجىريبەگە ساي كەلتىرىلگەنىن اتاپ ءوتتى.
«ەلىمىزدە بيزنەستىڭ وسى ءتۇرى جابىلمايدى، ونى رەتتەۋ تەتىكتەرى ەسكەرىلگەن. سايكەسىنشە، حالىقارالىق نورمالارعا ساي كەلتىرىلىپ وتىر. كەيبىر ەلدەردە وسى قىزمەتتەرگە مۇلدەم تىيىم سالىنعان. ەكىنشىدەن، ستاۆكالاردى ەسەپكە الۋ ورتالىعىن قۇرۋ ناتيجەسىندە سالىقتى اكىمشىلەندىرۋدىڭ ءتيىستى قادامدارى ەسەبىنەن بيۋدجەت كىرىستەرى تومەندەمەيدى. اتاپ ايتقاندا، سالىق ورگاندارى تاراپىنان ناقتى باقىلاۋ شارالارى ەسكەرىلگەن»، - دەدى نۇرلان نىعماتۋلين.
تاعى ءبىر اتاپ وتەتىن جاعداي، زاڭ جوباسىندا وسى سالا قىزمەتىن رەتتەۋدىڭ جاڭا تاسىلدەرى ۇسىنىلعان. ءماجىلىس ءتوراعاسىنىڭ ايتۋىنشا، جاڭا زاڭ ەكونوميكالىق تۇرعىدان دا، مورالدىق- پسيحولوگيالىق جاعىنان دا ويىن بيزنەسى سالاسىنداعى باقىلاۋدى كۇشەيتەدى. جالپى، قۇجات ويىن بيزنەسى سالاسىنداعى زاڭنامانى جەتىلدىرۋگە جانە ءباس تىگۋگە قاتىسۋشىلاردىڭ قۇقىقتارى مەن زاڭدى مۇددەلەرىن قورعاۋدى كۇشەيتۋگە، سونداي-اق بۋكمەكەرلىك كەڭسەلەر مەن توتاليزاتورلاردىڭ قىزمەتىن باقىلاۋدىڭ تيىمدىلىگىن ارتتىرۋعا باعىتتالعان.
