ايجان ەسماعامبەتوۆا: كوروناۆيرۋستى انىقتايتىن قازاقستاندىق تەست دايىن
بۇل تۋرالى ق ر باس مەملەكەتتىك سانيتار دارىگەرى ايجان ەسماعامبەتوۆا ق ر دەنساۋلىق ساقتاۋ مينيسترلىگىنىڭ مەديا ورتالىعىندا وتكەن تىكەلەي ەفيردە ايتتى، دەپ حابارلايدى قازاقپارات ءتىلشىسى.
«كوروناۆيرۋستى انىقتايتىن قازاقستاندىق تەست جاسالدى. ولار شىعارۋعا دا دايىن، الايدا ونىڭ ەرەكشەلىگىن انىقتاماي جاتىپ كوپ مولشەردە شىعارۋدى ماقسات ەتىپ وتىرعان جوقپىز. قازىرگى كەزدە ونىڭ ساپاسىن انىقتاۋ جۇمىسى جۇرگىزىلىپ جاتىر»، - دەيدى ق ر باس مەملەكەتتىك سانيتار دارىگەرى ايجان ەسماعامبەتوۆا. ونىڭ ايتۋىنشا، توتەنشە جاعداي رەجيمى اياقتالعانمەن، كارانتين شارالارى جۇرگىزىلە بەرەدى.
«باستىسى - اراقاشىقتىق پەن گيگيەنا ساقتاۋ كەرەك. كوروناۆيرۋسپەن اۋىرعانداردى ەمدەۋ جانە ولارمەن بايلانىستا بولعانداردى وقشاۋلاۋ ماقساتىندا رەسپۋبليكا بويىنشا 33 مىڭنان استام ورىن قاراستىرىلعان. ونىڭ ىشىندە ناۋقاس ادامدار ءۇشىن - 6 مىڭعا جۋىق ورىن، اۋرۋعا كۇدىكتىلەردى جاتقىزۋ ءۇشىن - 8 مىڭعا جۋىق پروۆيزورلىق ورىن جانە 20 مىڭ كارانتيندىك ورىن ءبولىندى» ، - دەيدى ول.
