ەلوردادا ءسان سالوندارىنا تەك شاشتاراز قىزمەتىن كورسەتۋگە رۇقسات ەتىلەدى

نۇر- سۇلتان. قازاقپارات - ەلوردادا ءسان سالوندارىنا تەك شاشتاراز قىزمەتىن باستاۋعا رۇقسات ەتىلەدى. شاشتاراز قىزمەتى دە بەلگىلى ءبىر تالاپتار شەڭبەرىندە كورسەتىلۋى ءتيىس، دەپ حابارلايدى قازاقپارات ءتىلشىسى.

«قازىرگى كارانتين جاعدايىندا كوشەلەر مەن قوعامدىق ورىنداردىڭ، ساياباقتاردىڭ ءبارى دە الدىن الۋ ماقساتىندا دەزينفەكتسيالانادى. ساياباقتار قازىر اشىلدى. وندا ءۇش ادامنان ارتىق جۇرمەۋگە كەڭەس بەرەمىز. ال وتباسىمەن بولسا جۇرۋگە بولادى. ادامدار 1-2 مەتر قاشىقتىقتى ساقتاپ ءجۇرۋى كەرەك. سوندىقتان ساياباقتا كىسى كوپ بولسا، مىندەتتى تۇردە ماسكا كيۋ كەرەك. ءسىز ءوز دەنساۋلىعىڭىزدى ساقتاۋ ءۇشىن وسى تالاپتاردى ساقتاۋعا مىندەتتىسىز. ساياباقتا جالعىز ءوزىڭىز جۇرسەڭىز كيمەۋگە بولادى»، - دەدى قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ تەحنيكالىق رەگلامەنتتەردى باقىلاۋ ءبولىمنىڭ باسشىسى قارلىعاش ابدىشيەۆا قالا اكىمدىگىنىڭ Facebook پاراقشاسىندا وتكەن ونلاين رەجيمدەگى باسپا ءسوز ءماسليحاتىندا.

ونىڭ ايتۋىنشا، قالاداعى ءىرى ويىن- ساۋىق جانە ساۋدا ورتالىقتارى ءالى اشىلماعان.

«قازىر ونداعى تەك ازىق- تۇلىك ساتاتىن سۋپەرماركەتتەر مەن ءدارىحانالار جۇمىس ىستەپ تۇر. وسى ەكەۋىنەن باسقا ساۋدا نۇكتەلەرى جۇمىسىن باستاماۋى كەرەك. ءسان سالوندارىنىڭ تەك شاشتاراز قىزمەتتەرى عانا جۇمىس ىستەيدى. كوسمەتيكالىق، مانيكيۋر نەمەسە پەديكيۋر قىزمەتتەرىن كورسەتۋگە تىيىم سالىنادى. شاشتاراز قىزمەتى تەك ماسكا كيىپ كورسەتىلۋى ءتيىس. كليەنتكە دە، شەبەرگە دە وسى تالاپ ورتاق. كەزەك بولماۋى ءتيىس. الدىن الا جازىلىپ قانا جۇمىس جۇرگىزۋگە بولادى» ، - دەدى ول.