ەلوردا اۆتوبۋستارىنىڭ العاشقى جۇمىس كۇنى: قالا كوشەلەرىنەن رەپورتاج

نۇر- سۇلتان. قازاقپارات - بۇگىننەن باستاپ ەلوردادا قوعامدىق كولىك قاتىناي باستادى. الايدا قالالىق اۆتوبۋس پاركتەرى تولىق قۋاتىندا قىزمەت كورسەتۋگە كىرىسكەن جوق. دەگەنمەن، ايالدامالاردا اۆتوبۋس كۇتكەن ادامداردى كورۋگە بولادى.

وسىعان وراي قازاقپارات ءتىلشىسى توتەنشە جاعداي رەجيمىنەن كەيىن جۇمىسىنا كىرىسكەن اۆتوبۋستاردىڭ العاشقى جۇمىس كۇنىن باقىلاپ قايتقان ەدى.

نۇر- سۇلتان قالاسىنىڭ اۆتوبۋس جۇرگىزۋشىلەرى ءۇشىن جۇمىس كۇنى بۇگىن تاڭ اتىسىمەن باستالدى. قالا كوشەلەرىنە شىعاتىن اۆتوبۋستار الدىمەن ءجىتى دەزينفەكتسيادان وتكىزىلەدى. وسىدان كەيىن تاڭعى ساعات 7 دە جولاۋشىلار اۆتوبۋسپەن دىتتەگەن جەرىنە بارا الادى.

«جۇمىسىمىزدى تاڭەرتەڭگى 7 دەن باستاعان ەدىك. ازىرشە جولاۋشىلار قاراسى قالىڭ ەمەس. مۇمكىن قوعامدىق كولىكتىڭ جۇرە باستاعانىن ءالى ەستىمەي جاتقان شىعار. جۇمىس بارىسىندا قاۋىپسىزدىكتىڭ بارلىق شارالارىن ساقتاپ، جولاۋشىلاردىڭ مۇمكىندىگىنشە ءبىر- بىرىنەن الشاق بولۋىن قاداعالاپ وتىرامىز. انتيسەپتيكتى ۇنەمى قولدانامىز. سوڭعى ايالدامادا اۆتوبۋستىڭ ىشىندە زالالسىزداندىرۋ جۇمىستارىن جۇرگىزەمىز» ، - دەيدى №56 باعداردىڭ جۇرگىزۋشىسى ساكەن. اۆتوبۋستاردىڭ سىرتقى قاپتالىندا ءىرى ارىپتەرمەن «ماسكاسىز كىرمەڭىزدەر!» دەگەن ەسكەرتۋ جاپسىرىلعان.

«ءيا، بۇگىننەن باستاپ جۇمىسقا كىرىستىك. ارىپتەستەرىمنىڭ باسىم بولىگى جۇمىس باستالعانىنا قۋانىپ جاتىر. ال ءوزىم كارانتين كەزىندە دە دەمالماي، تاپسىرىس بويىنشا جۇمىس ىستەگەن ەدىم. ءبىزدى ءتۇرلى ۇيىمدار قىزمەتكەرلەرىن تاسىمالداۋ ءۇشىن جالدادى» ، - دەيدى №29 باعدار جۇرگىزۋشىسى ەراسىل.

ەراسىل دا اۆتوبۋس سالونى ءبىر تاۋلىكتىڭ ىشىندە 2-3 رەت دەزينفەكتسيالاناتىنىن ايتادى. ايالدامالاردا اۆتوبۋس كۇتكەن جولاۋشىلار تۇر. دەگەنمەن، ادەتتەگى كۇندەگىدەي ەمەس، ادام اياعى سيرەك. ءوزىن ءاليا دەپ تانىستىرعان ەلوردا تۇرعىنى قوعامدىق كولىكتىڭ جولعا شىققانى دۇرىس بولدى دەپ ەسەپتەيدى.

«جۇمىستارىڭمەن قالا ىشىندە جۇرۋگە مۇمكىندىك جاسالعانى دۇرىس بولدى. شىنىمدى ايتسام، ۇيدە بوس وتىرىپ، ابدەن شارشاپ كەتتىك. ءبىراق، امال قانشا. ەندى قوعامدىق كولىكپەن ارى- بەرى جۇرگەندە قاۋىپسىزدىك شارالارىن قاتاڭ ساقتاعانىمىز جوق. ەركىنسۋگە بولمايدى. سەبەبى، كوروناۆيرۋس ءالى تولىق جويىلمادى، ەلىمىزدە دە، ەلوردامىزدا دا ىندەت ءالى بار» ، - دەدى ول.

بالالارىمەن قىدىرۋعا شىققان تاعى ءبىر ەلوردالىق رۋسلان ەسىمدى جولاۋشى دا اۆتوبۋستاردىڭ قاتىناي باستاعانىن قۇپ كورەدى.

«بالالار ۇيدەن ابدەن زەرىگىپ، دالاعا شىققىسى كەلەدى. ارينە، اۋلاداعا بالالار الاڭى اشىلدى. الايدا، بالالار سەرۋەندەگىسى كەلەدى. سوندىقتان تازا اۋا جۇتىپ، بوي سەرگىتسىن دەپ ساياباققا الىپ بارا جاتىرمىن. قاۋىپسىزدىك شارالارىن دا ەستەن شىعارمايمىز، ماسكامىز بار» ، - دەپ كۇلەدى رۋسلان.

CTS كومپانياسى قوعاممەن بايلانىس قىزمەتىنىڭ جەتەكشىسى وكسانا لوسكۋتوۆا بۇگىن تاڭەرتەڭ 392 اۆتوبۋس جولعا شىققانىن ايتادى. جالپى جوسپار بويىنشا قالا كوشەلەرىندە 451 اۆتوبۋس جۇيتكۋى ءتيىس بولعان. جۋىلىپ- شايىلىپ، زالالسىزداندىرىلىپ ۇلگەرگەنى وسى بولىپتى. سونىمەن ساعات 07:00-21:00 ارالىعىندا جۇرەتىن قوعامدىق كولىكتىڭ جۇرگىزۋشىسىنە دە، جولاۋشىسىنا دا دەزينفەكتسيالىق تالاپ پەن قاۋىپسىزدىك شارالارى بىردەي. ياعني، ولار ماسكا تاعىپ، قولعاپ كيىپ، انتيسەپتيك پايدالانىپ وتىرۋى قاجەت. جولاۋشىلار جولاقىسىن قولما- قول اقشامەن تولەي المايدى. بيلەت ساتىلمايتىندىقتان جولاقى تولەۋ SMS، QR- كود جانە ءموبيلدى قوسىمشالار ارقىلى قولما- قول اقشاسىز جۇرگىزىلەدى.

كارانتين ەنگىزىلگەنگە دەيىن دە قولما- قول اقشاسىز تولەم ۇلەسى 98 پايىز بولعان- دى. ال QR- كود نەمەسە كودتى تەرۋ ارقىلى تولەۋ ءۇشىن kaspi.kz, Homebank, SMSBUS، راحمەت، AstraBus, My Beeline, SENIM، Plus24, My Activ, OYBY قوسىمشالارىن پايدالانۋعا بولادى. Activ/Kcell, Beeline, Tele2, Altel ابونەنتتەرى ءۇشىن تەلەفون تەڭگەرىمى ارقىلى SMS- پەن تولەم جاساۋ (2505 نومىرىنە حابارلاما جىبەرۋ) قولجەتىمدى. ايتا كەتەرلىگى، بۇگىن ەلورداداعى قوعامدىق كولىك قوزعالىسىنا جاۋاپتى «Cts» كومپانياسى RTVM- اۆتوماتتار، كاسسالار مەن قاشىقتىقتان تولىقتىرۋ سەرۆيستەرى (Transcard, Kaspi.kz, Qiwi, Kassa24 جانە تاعى باسقا) قايتادان جۇمىس ىستەي باستاعانىن حابارلاعان بولاتىن.