اسقار مامين ەكونوميكانى قالپىنا كەلتىرۋ بويىنشا تاپسىرمالار بەردى

نۇر-سۇلتان. قازاقپارات – ق ر پرەمەر-ءمينيسترى اسقار مامين توتەنشە جاعدايدان كەيىنگى ەكونوميكانى قالپىنا كەلتىرۋ بويىنشا تاپسىرمالار بەردى، دەپ حابارلايدى قازاقپارات ءتىلشىسى.

«كەشە مەملەكەت باسشىسى قاسىم- جومارت توقايەۆ ەلىمىزدە توتەنشە جاعداي رەجيمىنىڭ اياقتالعانىن مالىمدەدى. اعىمداعى جىلدىڭ 4 ايىنىڭ قورىتىندىسى بويىنشا ەكونوميكا پايىز0,2 تومەندەدى. بۇل بۇكىل الەمدەگىدەي كارانتيندىك شەكۋتەۋلەر مەن توتەنشە جاعداي سالدارىنان بولدى. اسىرەسە، قىزمەت كورسەتۋ سەكتورىنىڭ جۇمىس بەلسەندىلىگى كارانتين كەزەڭىندەگى ەكى ايدا تومەندەدى. ساۋدا مەن كولىك سالالارى بويىنشا ءساۋىر ايىنىڭ كورسەتكىشتەرى ناۋرىز ايىمەن سالىستىرعاندا 30 پايىزعا تومەندەدى»، - دەدى پرەمەر- مينيستر قاڭتار-ساۋىردەگى الەۋمەتتىك- ەكونوميكالىق دامۋ قورىتىندىلارى تۋرالى ۇكىمەت وتىرىسىندا.

سونىمەن بىرگە وتكەن ءتورت ايدا ەكونوميكانىڭ بازالىق سالالارىندا وڭ ديناميكا ساقتالدى. وڭدەۋ ونەركاسىبىندەگى ءوسۋ - 7 پايىز، تاۋ- كەن ونەركاسىبىندە - 6 پايىز، قۇرىلىستا - 5,5 پايىز قۇرادى. سونداي-اق، ماشينا جاساۋدا - 25,4 پايىز، فارماتسيەۆتيكادا - 24,2 پايىز، قۇرىلىس ماتەريالى وندىرىسىندە - 15,6 پايىز، جەڭىل ونەركاسىبىندە - 13,9 پايىز ءوسىم بار.

«قازىرگى ۋاقىتتا قازاقستاندا كارانتين رەجيمى بىرتىندەپ جەڭىلدەتىلۋدە. جالپى ەكونوميكانى قالپىنا كەلتىرۋ باستالۋى ءتيىس. ەپيدەميالىق جاعداي، قىزمەت كورسەتۋ سەكتورلارىنىڭ بەلسەندىلىگى قالپىنا كەلۋى قاجەت. بۇعان مەملەكەتتىك قولداۋ شارالارى ىقپال ەتەدى. ونىڭ ىشىندە سالىقتىق ىنتالاندىرۋ، جەڭىلدىكپەن نەسيەلەۋ، وتاندىق تاۋارلاردى وتكىزۋگە كەپىلدىك بەرۋ، مەحانزيمى ارقىلى ىشكى ءوندىرىستى قولداۋ قاراستىرىلعان»، - دەدى پرەمەر- مينيستر.

سونىمەن قاتار، «اتامەكەن» كاسىپكەرلەر پالاتاسىمەن جانە بيزنەس قاۋىمداستىقپەن بىرلەسىپ، ىسكەرلىك بەلسەندىلىكتى ىنتالاندىرۋ، جۇمىسپەن قامتۋ جانە حالىقتىڭ تابىسىن قولداۋ بويىنشا شارالار تالقىلاندى.

«مەملەكەت باسشىسىنىڭ تاپسىرماسىمەن ازىرلەنگەن شارالار نەگىزىندە جىل سوڭىنا دەيىن ەكونوميكالىق ءوسۋدى قالپىنا كەلتىرۋ جونىندە كەشەندى جوسپار ازىرلەندى. ۇلتتىق ەكونوميكا مينيسترلىگىنە پرەمەر- مينيستر كەڭسەسىمەن بىرلەسىپ، وسى كەشەندى جوسپاردى كەلەسى وتىرىسقا شىعارۋدى تاپسىرامىن. اكىمدىكتەر قىزمەت كورسەتۋ سەكتورىن قالپىنا كەلتىرۋ بويىنشا ناقتى شارالار قابىلداۋى قاجەت. جالپى الداعى كەزەڭدەگى باسىم مىندەت - ەكونوميكانىڭ ءوزىن-ءوزى قامتاماسىز ەتۋىن ارتتىرۋعا، باسەكەگە قابىلەتتى شيكىزاتتىق ەمەس سەكتورعا نەگىزدەلگەن ەكونوميكانىڭ جاڭا قۇرىلىمىن قالىپتاستىرۋ بولادى»، - دەدى اسقار مامين.

اۆتور: ايجان سەرىكجان قىزى