ماۋلەن اشىمبايەۆ سەنات بيۋروسىنىڭ وتىرىسىن وتكىزدى

نۇر-سۇلتان. قازاقپارات - ق ر پارلامەنتى سەناتىنىڭ ءتوراعاسى ماۋلەن اشىمبايەۆ پالاتا بيۋروسىنىڭ وتىرىسىن وتكىزدى، دەپ حابارلايدى قازاقپارات.

وتىرىس بارىسىندا سەنات ءتوراعاسى توتەنشە جاعداي رەجيمىنەن كەيىن ەلىمىزدە مەملەكەت باسشىسىنىڭ تاپسىرماسى بويىنشا ەكونوميكانى قالپىنا كەلتىرۋدىڭ كەشەندى جوسپارى ىسكە اسىرىلاتىنىن اتاپ ءوتتى.

ونى ارنايى مەملەكەتتىك كوميسسيا ازىرلەيدى. ءوز كەزەگىندە، جوعارعى پالاتا پرەزيدەنتتىڭ ەكونوميكانى ودان ءارى دامىتۋعا جانە حالىقتىڭ ءال-اۋقاتىن ارتتىرۋعا ارنالعان ستراتەگياسىن زاڭنامالىق تۇرعىدا ساپالى ءارى دەر كەزىندە قامتاماسىز ەتۋگە ءتيىس. سونداي-اق، ماۋلەن اشىمبايەۆ مەملەكەت باسشىسى داعدارىستان كەيىنگى دامۋدىڭ ءبىرقاتار باسىم باعىتتارىن انىقتاپ بەرگەنىنە نازار اۋداردى.

ولاردىڭ قاتارىندا دەنساۋلىق ساقتاۋ جۇيەسىن جەتىلدىرۋ، قازاقستاندىقتاردىڭ ءومىرى مەن دەنساۋلىعىن قورعاۋ، ءبىلىم جانە عىلىم سالاسىن جاڭعىرتۋ، ادامي كاپيتالدى دامىتۋ، شاعىن جانە ورتا بيزنەستى وركەندەتۋ، ۇلتتىق ەكونوميكانى ءارتاراپتاندىرۋ ماسەلەلەرى بار.

سەنات ءتوراعاسىنىڭ ايتۋىنشا، دەپۋتاتتار قازىرگى كەزەڭدە پرەزيدەنتتىڭ بارلىق باستامالارىنا ءتيىمدى ءارى ۋاقىتىلى قولداۋ كورسەتۋى كەرەك.

«سوعان بايلانىستى ءبىز ءوز جوسپارىمىزدى قايتا قاراپ، مەملەكەت باسشىسىنىڭ ايتقاندارىن تولىق ورىنداۋ ءۇشىن سەنات جۇمىسىن ءتيىمدى ۇيىمداستىرۋىمىز قاجەت»، - دەدى ماۋلەن اشىمبايەۆ.

وتىرىستا ءماجىلىس ماقۇلداعان زاڭ جوبالارىن كوميتەتتەر اراسىندا ءبولۋ ماسەلەلەرى دە قارالدى. حالىقارالىق قاتىناستار، قورعانىس جانە قاۋىپسىزدىك كوميتەتى ەلىمىزدىڭ كەيبىر زاڭنامالىق اكتىلەرىنە توتەنشە جاعداي ماسەلەلەرى بويىنشا، سونداي-اق سوعىس جاعدايى ماسەلەلەرى بويىنشا تۇزەتۋلەر ەنگىزۋ تۋرالى زاڭ جوبالارى بويىنشا باس كوميتەت بولىپ بەلگىلەندى.

ەكونوميكالىق ساياسات، يننوۆاتسيالىق دامۋ جانە كاسىپكەرلىك جونىندەگى كوميتەتكە ەلىمىزدىڭ كەيبىر زاڭنامالىق اكتىلەرىنە لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى؛

سيفرلىق تەحنولوگيالاردى رەتتەۋ ماسەلەلەرى، سونداي-اق تۇتىنۋشىلاردىڭ قۇقىقتارىن قورعاۋ ماسەلەلەرى تۋرالى زاڭ جوبالارىنا قورىتىندى ازىرلەۋ تاپسىرىلدى.

كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا تولىقتىرۋلار ەنگىزۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ جوباسى بويىنشا، سونداي-اق «قازاقستان رەسپۋبليكاسى پارلامەنتىنىڭ كوميتەتتەرى مەن كوميسسيالارى تۋرالى» ق ر زاڭىنا پارلامەنتتىك وپپوزيتسيا ماسەلەلەرى بويىنشا وزگەرىس پەن تولىقتىرۋلار ەنگىزۋ تۋرالى» زاڭ جوباسى بويىنشا باس كوميتەت بولىپ بەلگىلەندى.

سونىمەن قاتار، بۇل كوميتەتكە اكىمشىلىك راسىمدىك-پروتسەستىك كودەكسىنىڭ جوباسى مەن زاڭناماعا اتقارۋشىلىق ءىس جۇرگىزۋ جانە قىلمىستىق زاڭنامانى جەتىلدىرۋ ماسەلەلەرى تۋرالى زاڭ جوباسى بەرىلدى.

سونىمەن قاتار بيۋرودا پارلامەنت سەناتىنىڭ 14- مامىردا وتەتىن وتىرىسىنىڭ كۇن ءتارتىبى بەلگىلەندى. سوعان سايكەس سەناتورلار «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» (ەكىنشى وقىلىم)، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» (ەكىنشى وقىلىم)، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە توتەنشە جاعداي ماسەلەلەرى بويىنشا وزگەرىستەر ەنگىزۋ تۋرالى»، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جۇمىلدىرۋ دايىندىعى مەن جۇمىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» (ءبىرىنشى وقىلىم) جانە «مامانداندىرىلعان مەكەمەلەردىڭ ارتىقشىلىقتارى مەن يممۋنيتەتتەرى تۋرالى كونۆەنتسيانى راتيفيكاتسيالاۋ تۋرالى» زاڭ جوبالارىن قارايدى.