ۇلى بريتانيا كارانتيننەن شىعۋ جوسپارىن جاريالادى
ءبىراق جوسپاردى بىرىككەن كورولدىك قۇرامىنا كىرەتىن مەملەكەتتەردىڭ بارلىعى قولداي قويمادى. ايتا كەتۋ كەرەك، ەلدە كوروناۆيرۋستان قايتىس بولعاندار سانى 32 مىڭ ادامعا جەتىپ وتىر.
عالىمجان قارامان ۇلى، ءتىلشى:
- ۇلى بريتانيا حالقى ەندى كوروناۆيرۋسقا قارسى جاڭا ۇران مەن تارتىپكە باعىنۋى ءتيىس. ۇكىمەت جۇرتشىلىقتى مەيىلىنشە ساق بولۋعا، ۆيرۋستىڭ تاراماۋىنا ىقپال ەتۋگە جانە ءوز ومىرلەرىن قاۋىپ- قاتەرگە تىكپەۋگە شاقىرادى. بۇگىننەن باستاپ ۇيدەن جۇمىس ىستەي المايتىندار جۇمىسقا شىعۋلارى كەرەك. ءلاجى بولسا، قوعامدىق كولىكە مىنبەۋلەرى جانە ەكى مەترلىك الەۋمەتتىك اراقاشىقتىقتى ساقتاۋلارى شارت. ايتپاقشى، ۇكىمەت جاياۋ جانە ۆەلوسيپەد قوزعالىسىن دامىتۋ ءۇشىن 2 ميلليارد ستەرلينگ فۋنتىن بولگەلى وتىر. سونداي- اق سارسەنبىدەن باستاپ كۇنىنە بىرنەشە رەت قىدىرۋعا جانە سپورتپەن اينالىسۋعا رۇقسات ەتىلەدى. ءبىرىنشى ماۋسىمنان باستاپ باستاۋىش مەكتەپتەر مەن كەيبىر دۇكەندەر اشىلادى. شىلدە ايىندا قوناق ۇيلەر مەن مەيراماحانالار جۇمىس ىستەي باستايدى. مامىر ايىنىڭ سوڭىنان باستاپ وزگە ەلدەردەن كەلگەن اۋە جولاۋشىلارى ەكى اپتا كارانتيندە بولادى.
بوريس دجونسون، ۇلى بريتانيا پرەمەر- ءمينيسترى:
- قازىر ءبىز «لوكداۋندى» توقتاتا المايمىز. ونىڭ ورنىنا شەكتەۋلەردى جەڭىلدەتۋ ءۇشىن بارىنشا ساقتىقپەن العاشقى امالداردى جاساپ جاتىرمىز. ءبىز عالىمداردىڭ پىكىرىنە قۇلاق اسىپ، حالىقتىڭ دەنساۋلىعىن ءجىتى قاداعالايتىن بولامىز. لەيبورشىلاردىڭ وپپوزيتسيالىق پارتياسى دجونسوننىڭ بايانداماسىن قاناعاتتانارلىقسىز دەپ باعالادى. ولاردىڭ پىكىرىنشە، ستراتەگيالىق جوسپار جاۋاپتاردان گورى سۇراقتارعا تولى.
كير ستارمەر، لەيبوريستەر پارتياسىنىڭ كوشباسشىسى:
- بۇگىن ەلگە ايقىندىق پەن ورتاق كەلىسىم قاجەت ەدى. ءبىراق ەكەۋى دە جوق سەكىلدى. انگليا، شوتلانديا جانە ۋەلس ءار جاققا تارتىپ جاتىر. ۇكىمەت ءۇشىن بۇل قاتەر ءتىپتى ىستەگى ولقىلىق. شىنىندا دا، شوتلانديالىقتار دجونسوننىڭ ءسوزىن سىنعا الدى. شوتلانديانىڭ ءبىرىنشى ءمينيسترى نيكولا ستەردجەن بريتانيالىقتاردىڭ ءوز سۇراقتارىنا ناقتى جاۋاپ الا الماعانىن ايتىپ، شوتلانديالىقتاردى «ساق بولۋ» ەمەس بۇرىنعى «ۇيدە وتىر» ۇرانىن ۇستانۋعا شاقىردى.
نيكولا ستەردجەن، شوتلانديانىڭ ءبىرىنشى ءمينيسترى:
- مەنىڭ ايتپاعىم: ەگەر ءسىز شوتلانديادا تۇرساڭىز اسا قاجەت بولماعان جاعدايدا ۇيدەن شىقپاڭىز. ۇيدە وتىرا بەرىڭىز. ۇلى بريتانيا پرەمەر- ءمينيسترى بولسا، دۇيسەنبىدە پارلامەنتتە ءوز جوسپارى جايىندا تولىق ءارى اشىق ايتىپ بەرۋگە ۋادە ەتتى. قاجەتتى قۇجات كەڭىنەن تالقىلانىپ، دەپۋتات- ارىپتەستەرى دجونسونعا سۇراقتى قارداي بوراتادى دەگەن بولجام بار.
اۆتورى: عالىمجان قارامان ۇلى
