قوسشى مەن قوياندى كەنتىندەگى بالالاردان كوروناۆيرۋس انىقتالدى

نۇر-سۇلتان. قازاقپارات - اقمولا وبلىسىنداعى قوياندى مەن قوسشى كەنتىندەگى بالالاردان كوروناۆيرۋس انىقتالدى، دەپ حابارلايدى قازاقپارات جەدەل شتابقا سىلتەمە جاساپ.

ۆيرۋستى جۇقتىرعانداردىڭ ءبىرى - اقكول اۋدانىنىڭ 1976 -جىلعى تۇرعىنى، ول وزىنە دەيىن كوروناۆيرۋستى جۇقتىرعان اداممەن جاقىن قارىم-قاتىناستا بولعان. 30-ءساۋىر كۇنى اقكول اۋداندىق اۋرۋحاناسىنىڭ كارانتيندىك ستاتسيونارىنا جاتقىزىلعان.

قالعان ەكى ادام سەلينوگراد اۋدانىندا تىركەلدى. ولاردىڭ ءبىرى 2010 -جىلعى قىز بالا، قوسشى اۋىلىنان، ول دا ۆيرۋستى جۇقتىرعان اداممەن بايلانىستا بولعان. اكەسى نۇر-سۇلتان ق. كاسىپورىن قىزمەتكەرى. ەكىنشىسى قوياندى اۋىلىنان - 2014 -جىلعى ۇل بالا. ءۇي كارانتينىندە بولعان. نۇر-سۇلتان ق. اتالعان كاسىپورىنمەن بايلانىستى.

اۋرۋحاناعا جاتقىزۋ ورنى رەتىندە اقمولا وبلىستىق تۋبەركۋلەزگە قارسى ديسپانسەرى انىقتالدى. اتالعان ازاماتتارمەن بايلانىستا بولعان ادامداردى انىقتاۋ ءۇشىن سانيتارلىق-ەپيدەميولوگيالىق تەرگەۋ جۇمىستارى جۇرگىزىلىپ جاتىر. اۋرۋ وشاقتارىن زارارسىزداندىرۋ جۇمىستارى قولعا الىنعان. وبلىس ستاتسيونارلارىندا 256 ەمدەلۋشى جاتىر، ولاردىڭ ىشىندە 17 سى پروۆيزورلىق ستاتسيوناردا، 225 ى كارانتيندىك ستاتسيوناردا، 14 ى جۇقپالى اۋرۋلار ستاتسيونارىندا. 718 ادام ءۇي كارانتينى رەجيمىن ساقتاپ وتىر.