10:30, 29 - ءساۋىر 2020 | GMT +6
پاكىستان ۇكىمەتى قازاقستان ەلشىلىگىنە كوروناۆيرۋسقا قارسى ءدارى-دارمەكتى تابىستادى
يسلاماباد. قازاقپارات - پاكىستان يسلام رەسپۋبليكاسىنىڭ ۇكىمەتى قازاقستان رەسپۋبليكاسىنىڭ يسلامابادتاعى ەلشىلىگىنە كوروناۆيرۋس ىندەتىن ەمدەۋ كەزىندە پايدالانىلاتىن گيدروكسيحلوروحيننىڭ 60 مىڭ تابلەتكاسىن تابىستادى.
بۇل تۋرالى ق ر سىرتقى ىستەر مينيسترلىگىنەن ءمالىم ەتتى، دەپ حابارلايدى قازاقپارات.
«ءدارى-دارمەكتەر جۋىق ارادا نۇر-سۇلتان قالاسىنا جەتكىزىلەدى جانە مەديتسينالىق مەكەمەلەر اراسىندا تاراتۋ ءۇشىن ءبىرىڭعاي ديستريبيۋتور - «س ق - فارماتسيا» ج ش س- عا تابىستالادى.
ق ر سىرتقى ىستەر مينيسترلىگى باۋىرلاس پاكىستان حالقى مەن ۇكىمەتىنە دوستىق نيەتى مەن يشاراتى ءۇشىن العىس بىلدىرەدى جانە بۇل ەلدەرىمىز اراسىنداعى ىنتىماقتاستىق رۋحىنا سايكەس كەلەدى»، - دەلىنگەن مينيسترلىك مالىمەتىندە.
ەسكە سالايىق، قازاقستان پرەزيدەنتى قاسىم-جومارت توقايەۆ قازاقستانعا گۋمانيتارلىق كومەك رەتىندە كوروناۆيرۋسقا شالدىققان ناۋقاستاردى ەمدەۋگە ارنالعان ءدارى ۇسىنعانى ءۇشىن پاكىستان ۇكىمەتىنە جانە پرەمەر-مينيستر يمران حانعا العىس بىلدىرگەن بولاتىن.
