كارانتيندەگى جۇلدىز: باتىرحان شۇكەنوۆتى ەسكە الۋ كونسەرتى وتەدى
«ونلاين كونسەرت بارىسىندا قازاق ەستراداسىنىڭ بەلگىلى ارتىستەرى روزا رىمبايەۆا، ساعىناي ابدۋللين، نادجيب ۆيلدانوۆ، رەنات گايسين، جانار دۇعالوۆا، رۇستەم نۇرجىگىت، دينايا، ءالي وقاپوۆ، سىرىمتاي ەڭسەپوۆ تىكەلەي ەفيردە باتىرحان شۇكەنوۆتىڭ رەپەرتۋارىنداعى اندەردى ورىندايدى»، - دەپ اتاپ وتەدى مادەنيەت مينيسترلىگىنىڭ باسپا ءسوز قىزمەتىنەن.
ەستەرىڭىزگە سالا كەتسەك، 23- ناۋرىزدان باستاپ مينيسترلىكتىڭ باستاماسىمەن قازاق كونسەرت پەن قازاق تەلەكوم ۇيىمدارى بىرلەسىپ، Live فورماتىنداعى «كارانتيندەگى جۇلدىز» اتتى جاڭا جوبانى باستادى.
ونىڭ اياسىندا تانىمال قازاقستاندىق ونەر جۇلدىزدارى مەن قازاق كونسەرتتىڭ ارتىستەرى جاندى داۋىستا جانە ونلاين فورماتتا ونەر كورسەتەدى. ونەرسۇيەر قاۋىمعا ءارتۇرلى باعىتتاعى - فولكلورلىق، ەسترادالىق، كلاسسيكالىق جانە ۇلت اسپاپتىق ورىنداۋدا كونسەرتتەر ۇسىنىلادى.
جوبانىڭ باستى ارتىقشىلىعى - كورەرمەن قاۋىم سۇيىكتى انشىلەرىنىڭ ونەرىن ۇيدەگى جايلى اتموسفەرادا تاماشالاي الادى.
وسى كۇندەرى روزا رىمبايەۆا، ساكەن مايعازيەۆ، مەدەۋ، جەڭىس سەيدۋللا ۇلى، جۇبانىش جەكسەن ۇلى، عادىلبەك جاڭاي، بەكبولات تىلەۋحان، قۇرماش ماحانوۆ پەن امىرە، تولقىن زابيروۆا، ارداق بالاجانوۆا مەن كلارا تولەنبايەۆا سىندى بەلگىلى انشىلەر وزدەرىنىڭ ونلاين كونسەرتتەرىن بەرىپ ۇلگەردى.
26- ناۋرىز كۇنى وتكەن روزا رىمبايەۆانىڭ ونلاين كونسەرتىن مەملەكەت باسشىسى حالىقتىڭ رۋحىن كوتەرەتىن ناعىز ونەر تۋىندىسى دەپ باعالادى.
