بيىل ستۋدەنتتەر سىناعى مەن ديپلوم جۇمىسىن قورعاۋ قالاي وتەدى

نۇر- سۇلتان. قازاقپارات – ق ر ءبىلىم جانە عىلىم ۆيتسە- ءمينيسترى ميراس داۋلەنوۆ توتەنشە جاعدايدا ستۋدەنتتەردىڭ ەمتيحان مەن ديپلومدىق جۇمىستى قالاي تاپسىراتىنىن ءتۇسىندىردى، دەپ حابارلايدى قازاقپارات ءتىلشىسى.

«ارالىق اتتەستات دەگەنىمىز - ءبىرىنشى، ەكىنشى جانە ءۇشىنشى كۋرس ناتيجەلەرى بويىنشا جۇرگىزىلەتىن سىناقتار. بۇل ەكزامەندەر مامىر ايىندا جۇرگىزىلەتىندىكتەن، وعان دەيىن كارانتين اياقتالۋى مۇمكىن. ال ەگەر كارانتين شارالارى توقتاماسا، ەمتيحاندى قاشىقتان تاپسىرۋعا تۋرا كەلەدى. قالالاردا تۇراتىن ستۋدەنتتەر سىناقتى قاشىقتان تاپسىرۋى ءتيىس. ال ينتەرنەتى جوق شالعاي ەلدىمەكەندەردە تۇراتىن ستۋدەنتتەر ارنايى وتىنىشپەن سىناقتى كەيىنگە قالدىرادى. مەنىڭشە، ستۋدەنت ءۇشىن سىناقتى كەيىنگە قالدىرۋ - ەڭ دۇرىس شەشىم»، - دەدى ۆيتسە- مينيستر Facebook جەلىسىندە وتكەن ونلاين كونفەرەنسيادا.

ال قورىتىندى اتتەستاتسيا – ج و و تۇلەگىنىڭ قانداي ناتيجەگە قول جەتكىزگەنىن كورسەتەدى جانە بۇل مەملەكەتتىك ءبىلىم بەرۋ ستاندارتىندا نەگىزدەلگەن ساياسات. قورىتىندى اتتەستاتسيا ەكى بولىمنەن تۇرادى، ونىڭ العاشقىسى - ديپلوم جۇمىسىن قورعاۋ.

«ديپلوم جۇمىسىن قورعاۋدى مىندەتتى تۇردە قالدىرامىز، سەبەبى قاشىقتان وقىتۋ رەجيمى 16 - ناۋرىزدا ەنگىزىلدى. ال ديپلومدى الدىن الا قورعاۋ جۇمىستارى اقپان، ناۋرىز ايلارىندا ءوتتى. زاڭسىز يەمدەنۋگە قارسى كۇرەستىڭ ەڭ ءىرى ءۇش جۇيەسى ارقىلى قورعاۋدىڭ جاڭا تالاپتارىن جازدىق. ياعني، ستۋدەنتتەر انتيپلاگيات جۇيەسىنە ديپلومدىق جۇمىستارىن ەنگىزەدى، ال وقىتۋشىلار مەن مەملەكەتتىك كوميسسيا مۇشەلەرى ولاردى تەكسەرەدى. ەگەر ستۋدەنت انتيپلاگيات جۇيەسى ارقىلى عىلىمي جۇمىسىن كورسەتسە، ونلاين تانىستىرىلىم جاساپ، سۇراقتارعا جاۋاپ بەرەدى جانە وسىلايشا ديپلومدىق جۇمىسىن قورعايدى»، - دەيدى م. داۋلەنوۆ.

ال ەگەر ستۋدەنتتىڭ ونلاين قورعاپ شىعاتىن مۇمكىندىگى بولماسا، سۇراقتار حات تۇرىندە كەز كەلگەن بايلانىس قۇرالى ارقىلى جىبەرىلەدى.

«كەشەندى ەكزامەنگە كەلسەك، ارىپتەستەر ونى جازباشا تۇردە جۇرگىزۋدى ۇسىنىپ وتىر. جينالىستا بارلىق ج و و- لار ەمتيحاندى ءادىل تاپسىراتىن جۇيەمەن قامتاماسىز ەتەتىنىن ايتتى. مەنىڭشە، وسى نۇسقا قولايلى بولادى. قازىرگى ۋاقىتتا ج و و- لاردىڭ كەشەندى ەمتيحان وتكىزۋ فورماتىن تۇرلەندىرۋگە دايىن ەكەنىن كورىپ وتىرمىز. بۇل جاعدايدا ءبىز ءبىلىم مينيسترلىگى رەتىندە 2018 -جىلى بەرىلگەن اكادەميالىق ەركىندىك پەن اكادەميالىق ساياساتقا جۇگىنۋدى ۇسىنامىز. ارينە، كارانتين رەجيمى جالعاسسا، ونلاين- ەكزامەنگە كوشۋگە تۋرا كەلەدى. ءبىراق مۇندا ستۋدەنتتىڭ بۇعان دەيىنگى باعالارىنىڭ جيىنتىعىن قولدانۋعا دا بولادى»، - دەدى م. داۋلەنوۆ.

ۆيتسە- مينيستر باعالاۋ قۇرالى بويىنشا سوڭعى شەشىمدى ج و و قابىلدايتىنىن ايتتى.

«ودان بولەك، قورىتىندى اتتەستاتسيا مەن ەكزامەندەردى جازعى ماۋسىمعا قالدىرۋ ماسەلەسى دە نازارعا الىندى. بۇل ماسەلەدە ءبىزدىڭ تاراپتان ەش شەكتەۋ جوق. ياعني، مينيسترلىك بەرەتىن مەملەكەتتىك ۇلگىدەگى ديپلوم بارلىق ج و و- عا بەرىلەدى. ال ونى ستۋدەنتتەرگە قاشان بەرەتىندەرىڭىزدى مينيسترلىك شەشپەيدى. بۇعان قاتىستى جوعارعى وقۋ ورىندارى ستۋدەنتتەر مۇددەسىن ەسكەرە وتىرىپ، دەربەس شەشىم قابىلدايدى»، - دەدى ميراس داۋلەنوۆ.

اۆتور: ايجان سەرىكجان قىزى