دۇنيەجۇزىلىك دەنساۋلىق ساقتاۋ ۇيىمى ترامپتىڭ ايىپتاۋلارىنا جاۋاپ بەردى
ونىڭ ايتۋىنشا، ۇيىم COVID-19 ۆيرۋسىنىڭ تارالۋىن ەشكىمنەن جاسىرماعان. سەبەبى، كوروناۆيرۋس پاندەمياسى باستالعالى بەرى د د ۇ ا ق ش- تىڭ اۋرۋدى باقىلاۋ جانە پروفيلاكتيكا ورتالىعى (CDC) ماماندارىمەن بىرگە جۇمىس ىستەگەن.
«د د ۇ جانە CDC COVID-19 ۆيرۋسى تارالعانعا دەيىن بىرگە جۇمىس ىستەدى. پاندەميا باستالعان كەزدە CDC ورتالىعىنىڭ كوپتەگەن امەريكالىق ساراپشىسى ۇيىمعا قولداۋ ءبىلدىرىپ، بىزبەن بىرگە جۇمىس ىستەدى. ولار جانىمىزدان تابىلدى. بۇل ءبىزدىڭ تەوريالىق تۇرعىدا ەشتەڭە جاسىرماعانىمىزدى بىلدىرەدى»، - دەدى باس ديرەكتور جەنەۆادا وتكەن بريفينگتە.
سونداي- اق، تەدروس ادحانوم گەبرەيەسۋس COVID-19 ۆيرۋسىمەن كۇرەستە د د ۇ ا ق ش پەن باسقا ەلدەرمەن اشىق بولعانىن اتاپ ءوتتى. ول كوروناۆيرۋتىڭ تارالۋى تۋرالى اقپاراتتى ەشكىمنەن جاسىرمايتىنىن جەتكىزدى. سەبەبى، بۇل مالىمەتتى جاسىرۋ ادامداردىڭ ءومىرى مەن دەنساۋلىعى قاۋىپ توندىرەدى.
«ءبىز (كوروناۆيرۋستى - اۆتور) جۇقتىرعاندار مەن قايتىس بولعاندار تۋرالى ستاتيستيكانى العان كەزدە بۇل سانداردىڭ ارتىندا ادامنىڭ تاعدىرى تۇرعانىن كورەمىز. سوندىقتان بىزدە قۇپيا جوق. بىزگە اقپارات كەلگەن سوڭ مەملەكەتتەر وعان دايىن بولۋى ءۇشىن ءبىز ونىمەن بولىسەمىز»، - دەپ تۇيىندەدى ءسوزىن ول.
ايتا كەتەيىك، 15-ساۋىردە ا ق ش دۇنيەجۇزىلىك دەنساۋلىق ساقتاۋ ۇيىمىن قارجىلاندىرۋ توقتاتقانىن مالىمدەگەن.
سونىمەن قاتار، ا ق ش پرەزيدەنتى «كوروناۆيرۋس ينفەكسياسى تۋرالى اقپاراتتى ۋاقىتىندا بەرمەدى، الەمگە شىندىقتى ايتپادى» دەپ د د ۇ- نىڭ جۇمىسىن سىنعا الىپ، ونى ايىپتاعان.
