پرەزيدەنتتىك ۇستەمەاقى دارىگەرلەر ەڭبەگىنىڭ ەلەنگەنىن كورسەتتى - استانالىق دارىگەر

نۇر-سۇلتان. قازاقپارات - ەلوردالىق كوپبەيىندى مەديتسينالىق ورتالىقتىڭ كۆي ءبولىمىنىڭ مەڭگەرۋشىسى ءاليا سارسەنوۆا دارىگەرلەردىڭ جالاقىسىنا قوسىلاتىن پرەزيدەنتتىك ۇستەمەاقى تۋرالى پىكىر ءبىلدىردى، دەپ حابارلايدى قازاقپارات.

«بۇل جولى ءبىزدىڭ ەڭبەكاقىمىز 3 ەسە كوبىرەك ءتۇستى جانە قالا اكىمدىگىنەن قوسىمشا سىياقى بەرىلدى. ودان بولەك، كوروناۆيرۋس ينفەكتسياسى ناۋقاستارىن ەمدەگەنىمىزگە پرەزيدەنتتىك ۇستەمەاقى ءتۇستى. پرەزيدەنتتىك ۇستەمەاقى ءۇش اي بويى بەرىلەدى. ەڭبەگىمىز ەلەنىپ، وسىنداي ماتەريالدىق قولداۋ كورسەتكەنى ءۇشىن ۇكىمەتكە جانە اكىمدىككە ريزاشىلىعىمىزدى بىلدىرەمىز»، - دەدى ءبولىم مەڭگەرۋشىسى.

ونىڭ ايتۋىنشا، اۋرۋحاناعا ورتاشا دەڭگەيدەگى وكپە قابىنۋ دياگنوزىمەن ناۋقاستار ءالى دە كەلىپ جاتىر.

«ناۋقاستار سانى ءالى ازايار ەمەس. اۋرۋحانادا مەديتسينالىق قورعانىس كيىمدەرى، بەتپەردە، قولعاپ، دەزينفەكتسيالىق قۇرالدار سانى جەتكىلىكتى. ءبىزدىڭ قىزمەتكەرلەر قوناق ۇيدە تۇرىپ جاتىر. تاڭەرتەڭ جانە كەشكە جۇمىسقا اپارىپ-اكەلەتىن اۆتوبۋس بەرىلگەن»، - دەيدى دارىگەر.

ەسكە سالا كەتسەك، ناۋرىز ايىنىڭ سوڭىندا ت ج رەجيمىن قامتاماسىز ەتۋ جونىندەگى مەملەكەتتىك كوميسسيا ەپيدەمياعا قارسى شارالارعا اتسالىسقان مەديتسينالىق قىزمەتكەرلەرگە ۇستەمەاقى تاعايىندادى.

قاۋىپتىلىگى بويىنشا ءبىرىنشى توپ ماماندارىنىڭ جالاقىسىنا ايىنا 850 مىڭ تەڭگە ۇستەمەاقى قوسىلادى. ەكىنشى توپ - پروۆيزورلىق ستاتسيونار مەن جەدەل جاردەم قىزمەتتەرىنىڭ دارىگەرلەرى، ورتا جانە كىشى مەديتسينا قىزمەتكەرلەرى. ولاردىڭ ۇستەماقىسى ايىنا 425 مىڭ تەڭگەنى قۇرايدى. ءۇشىنشى توپقا كارانتيندىك ستاتسيونار دارىگەرلەرى، ورتا جانە كىشى مەديتسينا قىزمەتكەرلەرى، سانيتارلىق دارىگەرلەر، جەدەل جاردەم جۇرگىزۋشىلەرى جانە تاعى باسقالارى كىرەدى. ولار ايىنا 212 مىڭ تەڭگە ۇستەمەاقى الادى. رەسپۋبليكا بويىنشا 30 مىڭنان استام دارىگەر ءتيىستى ۇستەمەاقى الادى.