ەنگىزىلگەن كارانتيندى ەرتە الىپ تاستاسا، ۆيرۋس قايتا ءورشۋى مۇمكىن - الەمدىك باسپا سوزگە شولۋ

None
None
نۇر-سۇلتان. قازاقپارات - «قازاقپارات» ح ا ا ادەتتەگىدەي نازارلارىڭىزعا الەمدىك باسپا سوزگە شولۋىن ۇسىنادى.

كوروناۆيرۋس يممۋنيتەتتىڭ گيپەررەاكسياسىن تۋعىزادى - The Wall Street Journal

كوروناۆيرۋس جۇقتىرعان ادامداردا يممۋنيتەتتىڭ گيپەررەاكسياسى پايدا بولۋى مۇمكىن. ماماندار بۇل جاعدايدا ەمدى قالاي جۇرگىزۋ كەرەك ەكەنىن زەرتتەپ جاتىر، دەپ جازادى The Wall Street Journal.

«يممۋندى جۇيەنىڭ گيپەررەاكتسياسى تەك كوروناۆيرۋسقا ەمەس، Covid-19 جۇقتىرعان ادامنىڭ وزىنە ۇلكەن زيان تيگىزۋى مۇمكىن. اسىرەسە، بۇل كوروناۆيرۋستىڭ اۋىر فورماسىنا شالدىققان ادامداردا بايقالادى. بۇل تۋرالى دارىگەرلەر مەن عالىمدار ايتتى. ەندى ولار پوتەنسيالدى ەمگە دۇرىس باعدار پايدا بولدى دەپ وتىر»، - دەپ جازادى اۆتور.

ماقالا اۆتورىنىڭ ايتۋىنشا، پاتسيەنتتەردە ۆيرۋستى ينفەكسيانىڭ قالاي داميتىنى تۋرالى اقپارات ءالى بەلىگىسىز. دەگەنمەن، كوپتەگەن ساراپشىلار ولىمگە ۆيرۋستان گورى، اعزانىڭ گيپەربەلسەندى يممۋندى جاۋابى اكەلەتىنىنە سەنىمدى.

«مامانداردىڭ ايتۋىنشا، يممۋندى رەاكسيا باسقارۋعا كەلمەي، ەمدەلۋشىنىڭ وكپەسى باسقا ورگاندارعا اۋا جىبەرۋدى توقتاتادى. بۇل تىنىس الۋدىڭ جەتىسپەۋشىلىگىنە، كەي جاعدايدا ولىمگە الىپ كەلەدى. دارىگەرلەردىڭ ايتۋىنشا، يممۋندى جۇيەنىڭ ىستەن شىعۋى وكپەنىڭ قىزمەتىن السىرەتەدى. ەندى ماماندار يممۋندى جۇيەنىڭ بەلسەندىلىگىن ازايتاتىن دارىلەردىڭ كوروناۆيرۋستىڭ اۋىر تۇرىنە شالدىققان ادامداردىڭ ەمىنە كومەكتەسەتىنىن انىقتاماق»، - دەپ جازادى اۆتور.


دارىگەرلەردىڭ ايتۋىنشا، كوروناۆيرۋس جۇقتىرعان اۋىر حالدەگى پاتسيەنتتەردە اۋرۋ ەكى ساتىدا بولادى. الدىمەن يممۋندى جۇيە ۆيرۋسقا جىلدام جانە ءتيىمدى ارەكەت ەتپەيدى. ودان كەيىن اگرەسسيۆتى جاۋاپ بەرە باستايدى. ياعني، اعزا ۆيرۋسقا دۇرىس جاۋاپ بەرمەيدى.

د د س ۇ: ەنگىزىلگەن شەكتەۋلەردى ەرتە الۋ قاۋىپتى – bbc

دۇنيەجۇزىلىك دەنساۋلىق ساقتاۋ ۇيىمىنىڭ باسشىسى كوروناۆيرۋستىڭ تارالۋىن توقتاتۋعا باعىتتالعان شەكتەۋلەردى ەرتە الىپ تاستاۋ قاۋىپتى ەكەنىن جانە بۇل ينفەتسيانىڭ قايتا ورشۋىنە الىپ كەلەتىنىن ايتتى، دەپ جازادى bbc .


تەدروس ادانوم گەبرەيسۋس مەملەكەت باسشىلارى شەكتەۋلەردى جەڭىلدەتۋ كەزىندە ەكونوميكالىق قيىندىقتار تۋىنداپ جاتقان كۇننىڭ وزىندە اباي بولۋ كەرەكتىگىن ايتتى.

«ەۋروپانىڭ كوروناۆيرۋستان ەڭ كوپ زارداپ شەككەن يسپانيا مەن يتاليا سەكىلدى مەسلەكەتتەرى كەيبىر قاتاڭ شارالاردى الىپ تاستاي باستادى. قازىرگى تاڭدا الەم بويىنشا ۆيرۋس جۇقتىرعاندار سانى 1,7 ميلليوننان اسىپ، قازا تاپقاندار سانى 100 مىڭنان استى»، - دەپ جازادى اۆتور.

جەنەۆاداعى ۆيرتۋالدى باسپا ءسوز كونفەرەنسياسىندا سويلەگەن تەدروس گەبرەيسۋس كەيبىر ەۋروپا ەلدەرىندە ەپيدەميا باسەڭدەگەنىن ايتتى. ول د د س ۇ شەكتەۋلەردى جەڭىلدەتۋگە بايلانىستى ستراتەگيالاردى ۇكىمەتتەرمەن بىرىگىپ جاسايتىنىن ايتىپ، بۇل تىم ەرتە بولماۋى كەرەك ەكەنىن اتاپ ءوتتى. «شەكتەۋلەردى ەرتە الىپ تاستاۋ ۆيرۋستىڭ قايتا ورشۋىنە الىپ كەلۋى مۇمكىن. بۇل وتە قاۋىپتى، ءارى ونى باسقارۋ دا قيىن بولادى»، - دەدى ول.

مۇناي نارىعىنداعى باعا سوعىسى قالاي ءوربۋى مۇمكىن؟ - Forbes

بەيسەنبى كۇنى ساۋد ارابياسى مەن رەسەي، وپەك+ باسشىلارى مۇناي كولەمىن قىسقارتۋ تۋرالى تاريحي كەلىسىمگە كەلدى. وسىلايشا مۇناي سوعىسى توقتاعانداي بولىپ، باعا قالىپقا كەلە باستادى، دەپ جازادى Forbes.

«2020 -جىلدىڭ مامىر ايىنان باستاپ ەكى اي، ياعني 30-ماۋسىمعا دەيىن وپەك+ مۇشە مەملەكەتتەر مۇنايدىڭ جالپى كولەمىن تاۋلىگىنە 10 ميلليون باررەلگە دەيىن ازايتادى. ودان كەيىنگى التى ايدا، 1 -شىلدە مەن 31-جەلتوقسان ارالىعىندا مۇناي كولەمى تاۋلىگىنە 8 ميلليون باررەل بولادى»، - دەپ جازادى باسىلىم.


اۆتوردىڭ ايتۋىنشا، كەلىسسوزدەر بارىسىندا 2021 -جىلدىڭ 1-قاڭتارى مەن 2022 -جىلدىڭ 30-ءساۋىرى ارالىعىندا مۇناي كولەمى تاۋلىگىنە 6 ميلليون باررەلگە دەيىن تومەدەيتىنى تۋرالى كەلىسىلگەن.

«كەلىسىم 2022 -جىلىدڭ 30-ساۋىرىنە دەيىن ىسكە اسىرىلادى. ونى ۇزارتۋ تۋرالى شەشىم 2021 -جىلدىڭ جەلتوقسانىندا قابىلدانۋى كەرەك. دەگەنمەن، جاريالانعان كولەم باعانى وندىرۋشىلەر ءۇشىن ەكونوميكالىق ءتيىمدى دياپازونعا قايتارا المايدى. ءتىپتى، قازىرگى نارىقتى تۇراقتاندىرۋ ءۇشىن تاۋلىگىنە 10 ميلليون باررەلگە دەيىن قىسقارتۋ دا جەتكىلىكسىز بولۋى مۇمكىن»، - دەيدى اۆتور.

ماقالادا رەسەي مەن ساۋد ارابياسى بيۋدجەتتەرىن تۇراقتاندىرىپ، ۆاليۋتا رەزەرۆتەرىنىڭ قىسقارۋىن ازايتۋ ءۇشىن باعانىڭ وسكەنىنە مۇددەلى. قازىرگى باعا دەڭگەىندە رەسەي 5-7 جىل، ساۋد ارابياسى 3 -جىل تۇرا الادى.

«كوروناۆيرۋس پاندەمياسىنىڭ ناتيجەسىندە ۇشاق ۇشپاي، ادامدار جۇمىسقا بارماي ءجۇر. بولجام بويىنشا، 2020 -جىلدىڭ ەكىنشى كۆارتالىندا سۇرانىس تاۋلىگىنە 15-35 ميلليون باررەل بولۋى مۇمكىن. بۇل بۇرىنعى كۇندەلىكتى تۇتىنۋ مولشەرىنىڭ ۇشتەن ءبىرىن قۇرايدى»، - دەيدى اۆتور.

گونكونگ قوناقۇيلەرى قىزمەتكەرلەردى روبوتتارعا الماستىرىپ جاتىر - China Daily

گونكونگ قوناقۇيلەرىندە قوناقتارمەن بايلانىستى ازايتۋ ماقساتىندا روبوت قىزمەتكەرلەر پايدا بولدى، دەپ جازادى China Daily.

«كوروناۆيرۋس پاندەمياسى كەسىرىنەن كوپ جەردە قىسقارتۋ ءجۇرىپ جاتىر. دەگەنمەن، L'hotel Group گونكونگ قوناق ۇيلەر وپەراتورى جاساندى ينتەللەكتىسى بار ءۇش روبوتتى جۇمىسقا الدى. ولار 432 بولمەگە قىزمەت كورسەتىپ، كارانتيندە جاتقان ادامداردىڭ وزىنە تاماق تاسي الادى. ءبىر كۇندە ءبىر روبوت 130-150 تاپسىرىس ورىندايدى»، - دەپ جازىلعان ماقالادا.

اۆتوردىڭ ايتۋىنشا، ءبىر روبوتتىڭ باعاسى 100 مىڭ دوللاردان اسادى.


اۆتور: ايكۇمىس بولاتبەك

سوڭعى جاڭالىقتار