17:20, 28 - ناۋرىز 2020 | GMT +6
قازىرگى ۋاقىتتا ۆيرۋسقا قاتىستى ەڭ ءتيىمدى كۇرەس - كارانتين رەجيمىن ساقتاۋ
نۇر- سۇلتان. قازاقپارات - اۋرۋ بەلگىلەرى بىردەن بىلىنبەگەن ادام ۇيدە وتىرماسا - باسقالاردىڭ وبالىنا قالادى. بۇل تۋرالى ق ر اقپارات جانە كوممۋنيكاتسيا ءمينيسترى داۋرەن ابايەۆ حابار 24 ارناسىندا وتكەن ونلاين بريفينگتە ايتتى.
«يتاليادا ءبىر كۇندە 969 ادام وسى ۆيرۋستان كوز جۇمدى. مۇنىڭ ءبارى ساقتىق شارالارىنا سالعىرت قاراۋدىڭ ناتيجەسى. بۇل جاعداي بارىمىزگە ساباق جانە ەسكەرتۋ بولۋى كەرەك. كوروناۆيرۋس اسىرەسە جاسى ۇلكەن ادامدارعا قاۋىپتى. ولاردىڭ ىشىندە اتامىز بەن اجەمىز، اتامىز بەن انامىز بار. ءوزىمىز ءۇشىن قورىقپاساق تا، ەڭ بولماسا سول ۇلكەندەرىمىزدى ويلايىق» ، - دەيدى ق ر اقپارات جانە كوممۋنيكاتسيا ءمينيسترى داۋرەن ابايەۆ.
ول كەيبىر ادامدا اۋرۋ بەلگىسى بىردەن بىلىنبەۋى مۇمكىن ەكەنىن ايتتى. «مۇنداي جاعدايدادا ادام ۇيدە وتىرماسا، باسقالارعا جۇقتىرعانىن ءوزى بىلمەي قالادى. وسىلايشا ونداعان وتباسىنىڭ وبالىنا قالۋى مۇمكىن. وسىنداي جاعدايدان ساق بولايىق. قازىرگى ۋاقىتتا ۆيرۋسقا قاتىستى ەڭ ءتيىمدى كۇرەس - كارانتين رەجيمىن ساقتاۋ» ، - دەيدى ول.