كارانتين: پوليتسيا قىزمەتكەرلەرى تۇرعىنداردى ۇيىنە قايتقانشا باقىلاي الادى

None
None
نۇر- سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ كارانتيننىڭ كۇشەيتىلگەن رەجيمىندە پوليتسيا قىزمەتكەرلەرىنىڭ جۇمىسىنا تۇسىنىستىك تانىتۋدى سۇرادى، دەپ حابارلايدى قازاقپارات ءتىلشىسى.

«قوعامدىق كولىككە، تاكسي، تاماق جەتكىزۋ قىزمەتتەرىنە سانيتارلىق تالاپتاردى قاتاڭ ساقتاۋ ءۇشىن سيركۋليار جاسالادى. كەشە ايتىلعانداي، بۇگىن تۇنگى 12-دەن باستاپ ۇيدەن شىعۋعا شەكتەۋ قويىلادى. ۇيدەن تەك ازىق- تۇلىك، ءدارى الۋعا نەمەسە جۇمىسقا بارۋ ءۇشىن شىعۋعا بولادى»، - دەدى مينيستر «حابار 24» تەلەارناسىنىڭ تىكەلەي ەفيرىندە.

سونىمەن بىرگە، 30- ناۋرىزدان باستاپ مەكەمەلەردىڭ باسىم كوپشىلىگى جۇمىسىن توقتاتادى. «كوشەدە پوليتسيا قىزمەتكەرلەرى توقتاتىپ، قايدا بارا جاتقانىڭىزدى سۇراسا، وعان تۇسىنىستىك تانىتىپ، جاۋاپ بەرۋ كەرەك. جۇمىسقا شاقىرعاندى راستاۋ ءۇشىن سىزدە تىكەلەي باسشىنىڭ نەمەسە كادر ءبولىمى قىزمەتكەرىنىڭ تەلەفون ءنومىرى بولعان ءجون. ازىق- تۇلىك دۇكەندەرى مەن ءدارىحانالار، ادەتتە، تۇرعىن ۇيلەرگە جاقىن ورنالاسادى. سوندىقتان، پوليتسيا قىزمەتكەرلەرى تۇرعىنداردىڭ قاجەتتى زاتىن ساتىپ الىپ، ۇيگە قايتقانىن باقىلاۋى مۇمكىن. وعان دا تۇسىنىستىك تانىتۋ قاجەت»، - دەدى داۋرەن ابايەۆ.

ايتا كەتەيىك، كوروناۆيرۋس ينفەكسياسىمەن نۇر- سۇلتان قالاسى بويىنشا 60 ادام، الماتى قالاسىندا - 48 ادام، قاراعاندى قالاسىندا – 4، جامبىل وبلىسىندا -3 ادام، اتىراۋ وبلىسى - 3 ادام، شىمكەنت قالاسىندا - 2 ادام، الماتى وبلىسىندا - 1 ادام، اقتوبە وبلىسىندا - 1 ادام، سولتۇستىك قازاقستان وبلىسىندا - 1 ادام، اقمولا وبلىسىندا - 1 ادام، پاۆلودار وبلىسىندا - 1 ادام، جالپى 125 ناۋقاس تىركەلدى.

بۇعان دەيىن داۋرەن ابايەۆ كارانتين رەجيمى كۇشەيتىلگەن كەزدەگى كوشەدە ءجۇرۋ تالاپتارىن تۇسىندىرگەن ەدى. سونداي- اق، كوروناۆيرۋستان قايتىس بولعانداردى جەرلەۋ تۋرالى باس سانيتارلىق دارىگەردىڭ قاۋلىسى شىعادى.

اۆتور: ايجان سەرىكجان قىزى

سوڭعى جاڭالىقتار