توتەنشە جاعداي: اتامەكەن قاي سالا كاسىپكەرلەرى زارداپ شەككەنىن انىقتادى

نۇر- سۇلتان. قازاقپارات - «اتامەكەن» ۇلتتىق كاسىپكەرلەر پالاتاسىنىڭ باسقارما مۇشەسى، اپپارات باسشىسى نۇرالى بوكەيحانوۆ ەلدە توتەنشە جاعدايدىڭ جاريالانۋىنان زارداپ شەككەن كاسىپكەرلەر تۋرالى باياندادى، دەپ حابارلايدى قازاقپارات ءتىلشىسى.

«كاسىپكەرلەر پالاتاسى 16 -ناۋرىزدا ارنايى جەدەل شتاب قۇردى، وعان ءۇش كۇندە كاسىپكەرلەر تاراپىنان 5660 ءوتىنىش قابىلداندى. بيزنەسمەندەر كوبىنە جۇمىسشىلار سانىن قىسقارتۋعا ءماجبۇر بولعان كومپانيالارعا نە ىستەۋ قاجەتتىگى تۋرالى، عيمارات جانە جەر جالداۋ اقىسىن تولەۋ مەرزىمىن ۇزارتۋ نەمەسە ودان بوساتۋ، كوممۋنالدىق قىزمەتتەر اقىسىنان بوساتۋ، شيكىزاتتىڭ جەتىسپەۋشىلىگى نەمەسە كۇرت قىمباتتاۋى، قۇرامداس بولشەكتەردىڭ جەتىسپەۋشىلىگى سىندى سۇراقتاردى قويدى. مۇنىڭ بارلىعى - شەكارانىڭ جابىلۋى مەن ارنايى قاۋىپسىزدىك شارالارىن ەنگىزۋدىڭ سالدارى» ، - دەدى ن. بوكەيحانوۆ ونلاين- بريفينگتە.

ونىڭ ايتۋىنشا، ساۋال جىبەرگەن 5660 كومپانيانىڭ %85 شاعىن بيزنەس،%13 ورتا بيزنەس جانە %2 ءىرى بيزنەس. ولاردىڭ 2 مىڭنان استامى - قىزمەت كورسەتۋ سالاسى، ءبىلىم بەرۋ ورتالىقتارى، سۇلۋلىق سالوندارى، كونسالتينگ، پوليگرافيا سالالارىن قامتيدى. «ساۋال جولداعان 5 مىڭنان استام كومپانيانىڭ %50 نۇر- سۇلتان مەن الماتى قالاسىنىڭ كاسىپكەرلەرى. كاسىپكەرلەردىڭ وزدەرى قانداي كومەك سۇراپ وتىر؟ ارينە، ەڭ الدىمەن قاراجات بويىنشا تۋىندايتىن سۇراقتار. بەس مىڭ كاسىپكەردىڭ %60 قارجىلاي قيىندىقتارعا ۇشىرادى دەگەن اقپارات كەلدى. ولاردىڭ ەڭ باستى سۇراعى - نەسيە تولەۋ مەرزىمىن ۇزارتۋ، ەكىنشىسى - سالىق تولەۋ مەرزىمىن ۇزارتۋ، ءۇشىنشىسى - كاسىپورىنداردىڭ ەڭبەك رەسۋرستارىن ساقتاۋعا وتەماقى بەرۋ. ءتورتىنشى - جالداۋ اقىسىن ازايتۋ نەمەسە ودان بوساتۋ. كوپتەگەن كاسىپكەرلەر شيكىزات پەن بولشەكتەردىڭ جەتىسپەۋشىلىگى ماسەلەسىن ايتتى» ، - دەدى ن. بوكەيحانوۆ.

بۇل اقپاراتتىڭ بارلىعىن كاسىپكەرلەر پالاتاسى جۇيەلەندىرىپ، مەملەكەتتىك ورگاندارعا جىبەردى. قازىر مەمورگاندارمەن ارنايى شارالار جۇرگىزىلىپ جاتىر. «كاسىپكەرلەردى قولداۋ ءۇشىن ەڭ باستى قولدانىلاتىن شارا - ولاردى سالىقتان بوساتۋ. سالىق تولەۋشىلەردىڭ كەيبىر ساناتى - جەكە كاسىپكەرلەر مەن زاڭدى تۇلعالاردى مۇلىك سالىعىن تولەۋدەن بوساتۋ، اۋىلشارۋاشىلىق وندىرۋشىلەرىن اۋىلشارۋاشىلىق جەر سالىعىنان بوساتۋ، جالپىعا بىردەي رەجيمدى قولداناتىن تۇلعالاردى ءىرى قارا مال جانە اسىل تۇقىمدى مالدى يمپورتتاۋ سالىعىن تولەۋشىلەردى بوساتۋ، سالىقتىق ەسەپتى وتكىزۋ مەرزىمىن وسى جىلدىڭ ەكىنشى، ءۇشىنشى توقساندارىنا اۋىستىرۋ جانە دە باسقا سالىقتىق كومەكتەر» ، - دەدى نۇرالى بوكەيحانوۆ. ايتا كەتەيىك، 17 - ناۋرىزدا مەملەكەت باسشىسى داعدارىستان جاپا شەككەن جەكە كاسىپكەرلەر مەن شاعىن جانە ورتا بيزنەس وكىلدەرىن قولداۋ شارالارىن قابىلداۋدى تاپسىردى.