كوروناۆيرۋس كەسىرىنەن تۋريزم سالاسىنداعى كاسىپكەرلەر تىعىرىققا تىرەلدى
ولاردىڭ اراسىندا شىعىسقازاقستاندىق تۋريستىك فيرمالار دا بار. لاۋرا احمەتجانوۆا قالاداعى تانىمال تۋريستىك اگەنتتىككە جەتەكشىلىك ەتەدى. كاسىپكەر ايەلدىڭ ايتۋىنشا، بۇگىنگى جاعداي ءماز ەمەس. جىلى جاقتا دەمالۋدى جوسپارلايتىندار ادەتتە ءدال وسى ۋاقىتتا كوپ تىركەلەتىن. اسىرەسە، تايلاند، بىرىككەن اراب امىرلىگى، حاينان ارالدارىنا سۇرانىس جوعارى ەدى. ال قازىر ونداي قاربالاس جوق. بۇعان قوسا، كوپتەگەن ەلدەر تۋريستىك باعىت رەتىندە ۇسىنىلمايتىن بولعان.
لاۋرا احمەتجانوۆا، تۋريستىك فيرما ديرەكتورى:
- ءبىز قانداي ەلدەرگە بارۋعا بولمايتىنى جايلى اقپاراتتان حاباردارمىز. ولاردىڭ قاتارىندا جەرگىلىكتى جۇرتتىڭ ەڭ سۇيىكتى ورىندارىنىڭ ءبىرى - حاينان ارالدارى دا بار. سوندىقتان قاڭتار- اقپان تۋريستەر سانى تىم ازايىپ كەتتى. ال كەيىنگى ۋاقىتقا ياعني ناۋرىز، ءساۋىر، ءتىپتى ودان ارعى ايلارعا برون جاساعانداردىڭ تولەمدەرى تولىق قايتارىلدى.
تاتيانا سەرەبروۆا كىشكەنە قىزى ۆاسيليسانى ەرتىپ، وتباسىمەن تەڭىزدە دەمالۋدى كوزدەگەن ەدى. الايدا، الەمدى دۇرلىكتىرگەن ينفەكتسياعا وراي بۇل جوسپاردان باس تارتتى. ەندى شەتەلدەن كورى قالا سىرتىنداعى ساياجايدا دەمالعاندى ءجون سانايتىن بولعان.
تاتيانا سەرەبروۆا، قالا تۇرعىنى:
- بالامىز ءالى كىشكەنتاي. ءبىز ساپارلاپ شىعۋدان گورى ارى- بەرى ۇشۋدان جاسقانامىز. ويتكەنى كىمدەرمەن ساپارلاس بولامىز. ۇشاق ىشىندە قاي ەلدەردەن كەلە جاتقان ادامدار وتىرادى دەگەندەي سۇراقتار مازالايدى. جولدان ورالعان سوڭ قاي قالادا كارانتينگە جاتامىز الدە وسى وسكەمەنگە دەيىن ۇشىپ كەلەمىز بە وسىنىڭ بارلىعىنا الاڭدايمىز. دوللار باعامىنىڭ ءوسىپ جاتقانى تاعى بار.
ەلميرا احمەتوۆا، ءتىلشى:
- «جىعىلعان ۇستىنە جۇدىرىق» دەپ كوروناۆيرۋسپەن قاتار دوللار باعامىنىڭ جوعارىلاۋى دا تۋريستىك سالا مەكەمەلەرىنە وڭاي تيمەي وتىر. ونى كاسىپ يەلەرى دە اشىق مويىندايدى. ماسەلەن مىنا فيرما وزدەرىندە راسىمدەلگەن ءاربىر ەكىنشى جولداما اقىسىن كەرى قايتارۋعا ءماجبۇر.
مارينا رۋسينا، تۋريستىك فيرما ديرەكتورى:
- ەرتە برون جاساعاندار تولەمدەرىن دە ەرتە جۇرگىزىپ، ءبولىپ تولەي باستايدى. تەڭگەمەن تولەيتىندىكتەن، ءبىز كۋرسقا تاۋەلدىمىز. ال وسى كۇنگى دوللار باعامىنىڭ ءوسۋىن ەشكىم كۇتكەن جوق. سوندىقتان تۇرعىندار تەك جۇقپالى دەرتكە بايلانىستى عانا ەمەس، وسى وزگەرىسكە وراي دا ساپاردان باس تارتۋدا. وسىلايشا، ينفەكسيا مەن قارجىلىق تۇراقسىزدىق قىسپاعىندا قالعان تۋريستىك فيرمالار ازىرگە تىعىرىقتان قالاي شىعارىن بىلمەي دال. ال رەسەي، قىتاي سياقتى كورشى ەلدەردە بۇل سالانى قولداۋدىڭ تەتىكتەرى قاراستىرىلىپ جاتىر.
اۆتورلارى: ەلميرا احمەتوۆا، اسلان تولەپوۆ
www.24.kz
