قازاقستان مەن قىتاي اراسىندا ساۋدا-ساتتىق قالاي ءجۇرىپ جاتىر؟
«كوروناۆيرۋستىڭ ەكونوميكاعا تيگىزەتىن ىقپالى جايلى ۇكىمەت باسشىسى بۇگىن ايتىپ ءوتتى. ەكونوميكاعا جاۋاپتى ادامداردىڭ ءبارى بۇل ماسەلەمەن اينالىسىپ جاتىر. شەكتەۋگە قاتىستى ايتارىم، البەتتە ەكونوميكا ماسەلەسى وتە ماڭىزدى. قازىردىڭ وزىندە قىتاي ەكونوميكاسى 1 پايىزعا قۇلدىرادى دەگەن مالىمەت بار. الەمدىك ەكونوميكاداعى قىتايدىڭ ۇلەسى 24 پايىز ەكەنىن ەسكەرسەك، بۇل احۋال كوپتەگەن ەلگە، ونىڭ ىشىندە قازاقستانعا اسەر ەتپەي قويمايدى. ايتسە دە وسىنشالىقتى ەكونوميكالىق شىعىندى ەسكەرگەنىمىزبەن، بۇگىنگى تاڭدا ازاماتتاردىڭ قاۋىپسىزدىگىن ءبىرىنشى ورىنعا قويامىز»، - دەدى ەرالى توعجانوۆ ۇكىمەتتىڭ باسپا ءسوز ورتالىعىنداعى بريفينگ بارىسىندا.
ۇكىمەت باسشىسىنىڭ ورىنباسارى ءدال قازىر قازاقستان مەن قىتاي اراسىندا تەمىرجول ارقىلى بايلانىس بارىن ءمالىم ەتتى.
«ماسەلەن، دوستىق بەكەتىندە ماشينيسكە دەيىن ءتيىستى شارالاردى قابىلداپ جاتىرمىز. سول سەبەپتى بارلىق الدىن الۋ شارالارى مەملەكەتتىك شەكارادان باستاپ جۇرگىزىلىپ جاتقانىن ايتقىم كەلەدى. جۇك تاسىمالى جاعىنان ناقتى شارالار قابىلدانعان. ماسەلەن وتكەن تاۋلىكتە عانا تەك 10 اۆتوكولىك قانا ءوتتى. ياعني، ءبىز ارى-بەرى قوزعالىستى بارىنشا قىسقارتىپ جاتىرمىز. البەتتە بۇل شەكتەۋلەر ءبىزدىڭ ەلدىڭ ەكونوميكاسىنا، ساۋداسىنا اسەر ەتىپ جاتىر. ايتسە دە تۇسىنىستىك بولۋ كەرەك»، - دەدى ول.
ءوز كەزەگىندە يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك قاماليەۆ ارى-بەرى قاتىناپ جۇرگەن كولىكتەرگە قاتىستى ءمان-جايدى ءتۇسىندىردى.
«كوبىنەسە قىتايعا ءبىز جاقتان اۆتوكولىك قۇرالدارى كىرەدى. ماسەلەن اقپان ايىندا 8-20 كولىكتەن كىرىپ ءجۇردى. ولار شەكارادان ارى وتكەننەن كەيىن بار-جوعى 3 شاقىرىم جۇرەدى دە كەدەندىك اۋماقتاعى قويمالارعا بارادى. ولار ق ح ر پوليتسەيلەرىمەن بىرگە ءجۇرىپ، جۇكتى الىپ، قايتا ەلگە قايتادى. ول جاقتان ەلگە قايتقان ازاماتتارىمىزدىڭ ءبارى بىردەن دارىگەرلەردىڭ باقىلاۋىنا الىنادى. ال قىتاي جاقتان سوڭعى ءبىر كولىك 17- اقپاندا عانا كەلگەن. وسىدان كەيىن ق ح ر تاراپىنان بىزگە اۆتوكولىكتەر كىرگەن جوق»، - دەدى ول.
