ەلجان ءبىرتانوۆ: كوروناۆيرۋس انىقتالعان جاعدايدا «ب» جوسپارى بار
«ەڭ باستىسى - ەلىمىزدە كوروناۆيرۋس ينفەكتسياسىن جۇقتىرعان ادام انىقتالعان جاعدايعا دايىن بولۋ. ول تۇرعىدا بىزدە «ب» جوسپارى بار. ول جوسپار ازىرلەنىپ، بارلىق مەملەكەتتىك ورگانمەن ماقۇلداندى. بۇل جوسپاردىڭ نەگىزى - قازاقستان اۋماعىندا ينفەكتسيانىڭ تارالۋىن بارىنشا شەكتەۋ. قازىرگى ۋاقىتتا بارلىق مەملەكەتتىك ورگانمەن، اكىمدىكپەن ءتيىستى جۇمىستار جۇرگىزىلىپ جاتىر»، - دەدى ەلجان ءبىرتانوۆ بۇگىن ۇكىمەتتىڭ باسپا ءسوز ورتالىعىندا وتكەن بريفينگ بارىسىندا.
مينيستر ءوز سوزىندە كوروناۆيرۋس ينفەكتسياسى بويىنشا جاعداي تولىعىمەن باقىلاۋدا تۇرعانىنا سەندىردى.
«دۇربەلەڭگە بەرىلۋدىڭ ەشقانداي نەگىزى جوق. ءبىزدى الاڭداتىپ تۇرعان نەگىزگى پروبلەما - جالعان اقپاراتتاردىڭ تارالۋى. سول سەبەپتى بارلىق اقپاراتتى تەك مينيسترلىكتىڭ رەسمي سايتىنان باقىلاپ وتىرۋدى وتىنەمىن»، - دەدى ول.
ايتا كەتسەك، كوروناۆيرۋسقا قاتىستى جالعان اقپاراتتىڭ تارالۋىنا - ۇكىمەت باسشىسىنىڭ ورىنباسارى ەرالى توعجانوۆ تا الاڭداۋشىلىق بىلدىرگەن ەدى. سونداي-اق ول ۇكىمەت كوروناۆيرۋسقا قاتىستى جاعدايدى باقىلاۋدا ۇستاپ، ءتيىستى شارالاردى قابىلداپ جاتقانىن ايتىپ بەردى.
كوروناۆيرۋسقا قاتىستى جالعان اقپاراتتاردىڭ ءبىرى وتكەن دەمالىس كۇندەرى جامبىل وبلىسىندا تاراعان بولاتىن.
