قازاقستان كوروناۆيرۋس تاراپ جاتقان ەلدەردەن جۇمىس كۇشىن تارتۋدى توقتاتادى
«يندۋستريا جانە ينفراقۇرىلىمدىق دامۋ مينيسترلىگى كوروناۆيرۋس جىلدام تاراپ جاتقان ەلدەرگە تۇراقتى رەيستەردى شەكتەسىن. سونىمەن قاتار ەلىمىزدىڭ فارماتسيەۆتيكالىق كاسىپورىندارىندا مەديتسينالىق ماسكالار مەن تاعى قوسىمشا قۇرالداردى شىعارۋدى ۇلعايتۋدى قامتاماسىز ەتسىن»، - دەدى اسقار مامين بۇگىنگى ۇكىمەت وتىرىسىندا.
ۇكىمەت باسشىسى سونىمەن قاتار ءوڭىر اكىمدىكتەرىنە مەملەكەتتىك جانە جەكە ۇيىمداردا، ج و و- لاردا، حالىققا قىزمەت كورسەتۋ ورتالىقتارىندا، ساۋدا ورتالىقتارى مەن بازارلاردا ەپيدەمياعا قارسى ءىس-شارالاردى كۇشەيتۋدى تاپسىردى.
«اكىمدىكتەر مەن ەڭبەك جانە حالىقتى الەۋمەتتىك قورعاۋ مينيسترلىگى شەتەلدەن جۇمىس كۇشىن تارتۋ ءۇشىن كوروناۆيرۋستىڭ انىقتالۋ دەڭگەيى قولايسىز ەلدەردىڭ ازاماتتارىنا رۇقسات بەرۋدى توقتاتا تۇرسىن. سونداي-اق اقپارات جانە قوعامدىق دامۋ مينيسترلىگى دەنساۋلىق ساقتاۋ مينيسترلىگىمەن بىرلەسىپ، كوروناۆيرۋس ينفەكتسياسىنىڭ الدىن الۋ شارالارىن كۇشەيتۋ بويىنشا حالىقپەن ساپالى اقپاراتتىق جۇمىس جۇرگىزسىن»، - دەدى ول.
