نۇر-سۇلتاننىڭ اكىمشىلىك ورتالىعىندا نەلىكتەن تۇرعىن ۇيلەر سالىنىپ جاتىر؟

نۇر-سۇلتان. قازاقپارات - ەلورداعا كوشىپ كەلىپ جاتقان ءارى كوشكىسى كەلەتىن حالىقتىڭ قاراسى كوپ. ىشكى كوشى-قونداعى وسى ءۇردىس ۇيگە دەگەن سۇرانىستى ارتتىرىپ، باسپانا قۇرىلىسىنىڭ قارقىندى تۇردە جۇرگىزىلۋىنە سەپتىگىن تيگىزگەنى ءسوزسىز.

ايتسە دە كەيبىر باسپانا قۇرىلىستارىنىڭ بەلگىلەنگەن ورنى مەن بارىسى سۇراق تۋىنداتپاي قويمايدى.

ماسەلەن، د. قونايەۆ كوشەسىندەگى «Rixos» قوناق ءۇيى مەن قابانباي باتىر كوشەسىنىڭ اراسىنداعى شاعىن بوس جەردە كوپقاباتتى تۇرعىن ءۇي قۇرىلىسى ءجۇرىپ جاتىر. سول سەكىلدى دوستىق كوشەسىندەگى «كەرۋەن» س و و ماڭىندا دا كوپقاباتتى ۇيلەر تۇرعىزىلۋدا. نۇر-سۇلتاننىڭ اكىمشىلىك ورتالىعىندا وسىلايشا تۇرعىن ءۇي تۇرعىزۋ قانشالىقتى ورىندى؟ كەلەشەكتە ونسىز دا كۇشەيىپ كەلە جاتقان كولىك كەپتەلىسىن ودان ارى ۇدەتپەي مە؟ تۇرعىن ۇيدەن گورى بالكىم ونداي اۋماقتارعا ساياباق سالىپ، قالا تىنىسىن كەڭەيتۋگە بولار ما ەدى؟ مىنە وسى سۇراقتاردى ەلوردا اكىمى التاي كولگىنوۆكە قويىپ كورىپ ەدىك.

قالا اكىمدىگىنەن بىلگەنىمىزدەي نۇر-سۇلتان قالاسىنىڭ سارايشىق جانە قونايەۆ كوشەلەرىنىڭ اراسىندا ورنالاسقان جەر ۋچاسكەسىندە «Sauran Towers» ج ش س تۇرعىن ءۇي سالىپ جاتىر ەكەن. مۇندا جاناستىرا سالىنعان ورىن-جايلار دا، پاركينگ پەن بيزنەس ورتالىق، ءتىپتى جالپى ءبىلىم بەرۋ مەكتەبى بار كوپ پاتەرلى تۇرعىن ءۇي كەشەندەرى بوي كوتەرمەك. اتالعان جەر ۋچاسكەسى «Sauran Towers» ج ش س- عا 5 جىل مەرزىمگە ۋاقىتشا وتەۋلى ۇزاق مەرزىمدى جەر پايدالانۋ قۇقىعى بويىنشا بەرىلگەن. ال نۇر-سۇلتان قالاسى ەسىل وزەنىنىڭ سول جاعالاۋىندا ورنالاسقان جەر ۋچاسكەسىندە اپارتامەنتتەرى، جاپسارلاستىرا-جاناستىرا سالىنعان ورىن-جايلارى مەن پاركينگى بار كوپ بەيىندى تۇرعىن ءۇي كەشەنىن «Gross House Group» ج ش س سالىپ جاتقان كورىنەدى. اتالعان جەر ۋچاسكەسى «Gross House Group» ج ش س- نىڭ جەكە مەنشىك قۇقىعىندا تيەسىلى.

ماسەلەنى زەرتتەي وتىرىپ «نۇر-سۇلتان قالاسىنىڭ باس جوسپارىندا جوعارىدا اتالعان تۇرعىن ۇيلەردىڭ قۇرىلىسىن جۇرگىزۋ جوسپارى بۇرىننان بار ما؟» دەگەن سۇراق تۋىندايدى. قازاقپاراتتان جولدانعان ەكىنشى سۇراققا قالا اكىمى بىلايشا جاۋاپ بەرەدى.

«ۇكىمەتتىڭ 2001-جىلعى جانە وزگەرىستەر مەن تولىقتىرۋلار ەنگىزۋ تۋرالى 2016-جىلعى قاۋلىسىمەن ەلوردانىڭ باس جوسپارىن تۇزەتۋ جوباسى بويىنشا قالا دامىپ كەلەدى. باس جوسپارعا سايكەس اكىمشىلىك ورتالىقتا نەگىزىنەن ۇزدىكسىز قوزعالىس ماگيسترالدارى مەن جالپى قالالىق ماگيسترالدار بويىندا ورتالىقتان پەريفەرياعا قاراي تومەندەيتىن ءزاۋلىم عيماراتتار سالۋ كوزدەلگەن. قالانىڭ باس جوسپارى - قالانىڭ جالپى دامۋ ستراتەگياسىن ايقىندايتىن جانە ونىڭ اۋماعىن كەشەندى قالا قۇرىلىسىن يگەرۋدىڭ نەگىزگى ماسەلەلەرىن رەتتەيتىن باستى قالا قۇرىلىس قۇجاتى. جەكەلەگەن ناقتى عيماراتتار مەن قۇرىلىستاردى ورنالاستىرۋدى جوسپارلاۋ باس جوسپار جوبالارىمەن شەشىلەتىن مىندەتتەر اياسىندا كىرمەيدى»، دەلىنگەن جاۋاپحاتتا.

قالا اكىمدىگىنىڭ جاۋابىنا سۇيەنسەك، قازاقستاننىڭ ەلدى مەكەندەرىندە تۇرعىن ءۇي-ازاماتتىق قۇرىلىستىڭ جەكەلەگەن نىساندارىن ورنالاستىرۋ ورنىن تاڭداۋ ت ج ج (تۇبەگەيلى جوسپارولاۋ جوباسى) دەڭگەيىندە ورىندالعان. باس جوسپاردا سالىنعان جالپى جوبالىق يدەيالاردى ناقتىلاۋ، ەگجەي-تەگجەيلەۋ ءىسى 1:2000 ماسشتابىندا ازىرلەنەتىن قالا قۇرىلىسى قۇجاتىندا جۇرگىزىلەدى. قالانىڭ ءتۇرلى بولىكتەرىنىڭ تۇبەگەيلى جوسپارلاۋ جوبالارى قالانىڭ ءار اۋدانىن قالا قۇرىلىسىن يگەرۋدىڭ وزەكتىلىگىنە جانە ول ءۇشىن قالادا قانداي مۇمكىندىكتەر بار ەكەنىنە بايلانىستى ءارتۇرلى ۋاقىتتا ورىندالادى.

«Rixos» قوناق ءۇيىن ورنالاستىرۋ جانە قابانباي باتىر داڭعىلى اۋدانىنىڭ ت ج ج سوڭعى تۇزەتۋ 2018-جىلى جۇرگىزىلدى (09.04.2018ج. № 510-8 قاۋلى). بۇل اۋداندا ت ج ج سايكەس مەكتەپكە دەيىنگى ءبىلىم بەرۋ نىساندارى، پاركينگى مەن بيزنەس- ورتالىعى بار كوپبەيىندى تۇرعىن ءۇي كەشەنىن ورنالاستىرۋ كوزدەلگەن. دوستىق كوشەسىندەگى «كەرۋەن» س و و ماڭىنداعى جاڭا اكىمشىلىك ورتالىق اۋدانىنىڭ ت ج ج تۇزەتۋ 2015-جىلى جاسالدى (30.07.2015ج. № 120-24 قاۋلى). بۇل اۋداندا دا كوپ بەيىندى كەشەندى ورنالاستىرۋ كوزدەلگەن»، - دەپ حابارلايدى قالا اكىمدىگىنەن.

قالا اكىمدىگى ەلوردانىڭ اكىمشىلىك ورتالىعىندا تۇرعىن عيماراتتار سالۋدىڭ نەگىزدىلىگى تۋرالى سۇراقتار حالىق تاراپىنان ءجيى تۋىندايتىنىن راستاپ وتىر.

«وسىعان بايلانىستى كەلەسىنى حابارلايمىز: ءىرى اكىمشىلىك ورتالىقتاردىڭ جانە بويىندا تەك اكىمشىلىك عيماراتتار ورنالاساتىن كوشەلەردىڭ جۇمىس جاساۋىنىڭ شەتەلدىك تاجىريبەسىن تالداۋدان جۇمىس ۋاقىتى اياقتالعاننان كەيىن تەرەزەلەردە جارىق سونگەن سوڭ جانە كوشە قوزعالىسى توقتاعان سوڭ ولار بوس قالاتىنى، كۇيزەلىسكە ۇشىرايتىن اسەر قالدىراتىنى انىقتالدى. سوندىقتان زامانعا ساي قالا قۇرىلىسى تەورياسى مەن تاجىريبەسىندە اكىمشىلىك ورتالىقتاردا ولار ومىرگە تولى جانە كۇندىزگى ۋاقىتتا عانا ەمەس، سونداي-اق كەشكى جانە تۇنگى ۋاقىتتا تارتىمدى بولۋى ءۇشىن تۇرعىن عيماراتتار، ساۋدا جانە ويىن-ساۋىق مەكەمەلەرىن ورنالاستىرۋ ءجون دەپ ەسەپتەلەدى»، - دەگەن جاۋاپ كەلدى اكىمدىكتەن.