جۇبايلاردىڭ سىيلاستىعىن ارتتىرۋ ءۇشىن نە ىستەۋ كەرەك؟

نۇر-سۇلتان.قازاقپارات نەكە- - قايىق، ءومىر - تەڭىز. قايىعىڭىزدى ءومىردىڭ دۇلەي تەڭىزى شىر كوبەلەك اينالدىرىپ الىپ كەتە مە، تاسقا سوعىپ، كۇيرەتە مە، الدە تەڭىزدىڭ تىنىق كەزدەرىن تاماشالاپ، داۋىل سوققاندا يىق تىرەسىپ، ەسكەكتى بىرگە ەسىپ ءجۇرىپ، كوزدەگەن جاعالاۋىڭىزعا جەتەسىز بە؟

البەتتە، قايىقتىڭ تاعدىرى ەرلىك- زايىپتىلاردىڭ قولىندا. جۇبايىلاردىڭ بىرىنە- ءبىرى دەگەن سىيلاستىعى ارتا ءتۇسۋ ءۇشىن نە ىستەۋ كەرەك؟ تومەندەگى كەڭەستەرگە دەن قويىپ، وتباسىڭىزعا ادەت ەتىپ قالىپتاستىرىڭىز.

1. جاردەم. جۇبايىنىڭ كومەگىنە كوبىنەسە كەلىنشەكتەر مۇقتاج. وعان بىرنەشە سەبەپ بار: ەر ادام كۇنى بويى ۇيدەن تىس جۇمىس ىستەپ شارشايدى، وعان ايەلىنىڭ ۇيدەگى كۇيبەڭ تىرلىگى كورىنبەيدى. قوعامدا دا ايەلدىڭ ءۇي ىشىندەگى جۇمىسى تومەن باعالانادى، ءتىپتى ەڭبەك دەپ سانالمايدى. شىن مانىندە، بۇل شارشاتاتىن، كەيدە مەزى قىلاتىن ءبىر سارىندى ەڭبەك. ەڭبەگىنىڭ كورىنبەيتىنى ايەلدى ودان سايىن قاجىتا تۇسەدى. سوندىقتان وسى ماسەلەنى تالقىلاپ، ەرلىك- زايىپتىلار ءوزارا شەشۋى ءتيىس. ونىڭ جولدارى كوپ: ەر ادام كۇنىنە ءبىر ساعات نەمەسە اپتاسىنا ەكى- ءۇش ساعات بالاعا قارايدى، ال كەلىنشەگى سول كەزدە تىنىعادى نەمەسە وزىنە قاجەت شارۋالارىن ىستەيدى، نە بولماسا، دۇكەننەن تاماق الۋدى كۇيەۋى ءوزى موينىنا الادى، تاعى باسقا امالداردى ويلاستىرىپ، قولدانۋعا بولادى.

2. العىس. جۇبايلار ءبىر- ءبىرىنىڭ كومەگىن، ەڭبەگىن، قامقورلىعىن ەلەۋسىز قالدىرماي، ءاردايىم ريزاشىلىق ءبىلدىرىپ، سول كومەكتىڭ قانشالىقتى قۇندى ەكەنىن ايتىپ وتىرسا، ءوزىنىڭ دە، جۇبايىنىڭ دا مەيىرىن اسىرىپ وتىرار ەدى. بالاعا دا جاقسى ونەگە. اتا- اناسىنىڭ ءوزارا سىيلاستىعى بالانىڭ وزىنە- ءوزى دەگەن سەنىمىن نىعايتادى.

3. قولداۋ. جۇبايىڭىزدىڭ باستاماسىن، وي- پىكىرىن جەر قىلماي، كوڭىل قويىپ تىڭداپ، قولداۋ كورسەتىپ وتىرىڭىز. انىق كورىنىپ تۇرعان قاتەلىگى بولسا، نامىسىنا تيمەي، جۇمساق سوزبەن جەتكىزىپ كورىڭىز. كەلىسپەسە، ءوز دەگەنىڭىزگە كوندىرۋگە تىرىسپاڭىز. جۇبايىڭىز - ەرەسەك، اقىلدى ادام ەمەس پە؟ ءتىپتى قاتەلەسسە دە، نە قىلار؟ ەگەر ماسەلەنىڭ ۇشى سىزگە دە تيەتىن بولسا، ءبىرجولا شەشىم قابىلداۋدى كەيىنگە قالدىرا تۇرۋىن سۇراڭىز. قولايلى ءسات تۋعاندا، قايتا ورالىپ، اقىلعا سالىڭىز.

4. ادامعا جەكە كەڭىستىك قاجەت، سونىڭ ۇمىتپاڭىز. كەيدە جالعىز، تىنىشتىقتى قاجەت ەتەسىز. كەيدە ۇيدەن تىس، قۇربى- قۇرداسپەن بىرگە بولعىمىز كەلەدى. ايەل ادام كەيدە قۇربىلارىمەن سەرۋەندەسە، ەر ادام بالىق اۋلاپ كەلسە، بىرىنەن- ءبىرى تىنىعىپ، قايتا قاۋىشاتىن بولسا، قارىم- قاتىناسى نىعايا تۇسەدى. ەركەكتىڭ ەتەگىنە جارماسۋدىڭ دا، ايەلدى دە ۇيدە قاماپ ۇستاۋدىڭ دا ەشكىمگە پايداسى جوق.

Massaget.kz