13:58, 21 - اقپان 2020 | GMT +5
مەملەكەت باسشىسى ارحيتەكتور، اكادەميك ءابدىساعيت ءتاتىعۇلوۆتىڭ وتباسىنا كوڭىل ايتتى
نۇر-سۇلتان. قازاقپارات - قاسىم-جومارت توقايەۆ بەلگىلى ارحيتەكتور، اكادەميك، مەملەكەتتىك سىيلىقتىڭ لاۋرەاتى ءابدىساعيت ءتاتىعۇلوۆتىڭ دۇنيە سالۋىنا بايلانىستى ونىڭ وتباسىنا كوڭىل ايتۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
«ءابدىساعيت شايمۇحانبەت ۇلى قازاقستاندا قۇرىلىس سالاسىن دامىتۋعا ۇلكەن ۇلەس قوسقان قايراتكەر. ۇزاق جىلدار بويى «KAZGOR» جوبالاۋ اكادەمياسىن باسقارىپ، ەلىمىزدە ەڭسەلى عيماراتتار مەن سالتاناتتى سارايلاردىڭ بوي كوتەرۋىنە سىڭىرگەن ەڭبەگى وتە مول. ول ۇلتتىق ساۋلەت مەكتەبىن قالىپتاستىرىپ، شاكىرت تاربيەلەۋدىڭ وزىق ۇلگىسىن كورسەتتى. ونەگەلى عۇمىر كەشىپ، سوڭىنا وشپەس ءىز قالدىرعان ءابدىساعيت ءتاتىعۇلوۆتىڭ جارقىن بەينەسى حالقىمىزدىڭ جۇرەگىندە ماڭگى ساقتالادى»، - دەلىنگەن جەدەلحاتتا.
