12:44, 20 - اقپان 2020 | GMT +5
دانيال احمەتوۆ: شەكارادان بىردە- ءبىر شەتەل ازاماتى وتپەيدى
وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆ وبلىس پەن قىتاي اراسىنداعى شەكارانىڭ وزگە ەلدىڭ ازاماتتارى ءۇشىن جابىلعانىن مالىمدەدى، دەپ حابارلايدى قازاقپارات.
ءوڭىر باسشىسى زايسان اۋدانىنىڭ تۇرعىندارىمەن كەزدەسىپ، شەكارادان شەتەلدىڭ بىردە- ءبىر ازاماتى وتپەيتىنىن ايتتى.
«قىتايمەن ەكى اراداعى شەكارا جابىلدى. سول ءۇشىن بارلىقتارىڭىزدى سابىرعا شاقىرامىن. ال سول ەلدەن كەلگەن ءبىزدىڭ 5 ازاماتىمىز وقشاۋلانىپ، كارانتينگە جاتقىزىلادى. 3 كۇننەن كەيىن زايسانعا تاعى كەلىپ جاعدايدى باقىلايمىن» ، - دەدى دانيال كەنجەتاي ۇلى.
وسىعان دەيىن وبلىس اكىمدىگى زايسان اۋدانىنداعى اۋرۋحانالارعا كوروناۆيرۋس جۇقتىرعان قىتاي ازاماتتارى جاتقىزىلادى دەگەن اقپاراتتىڭ جالعان ەكەنىن مالىمدەگەن ەدى.
